Ibi babitangaje tariki ya 07/03/2014 ubwo ibitaro by’akarere ka Ruhango biherereye mu murenge wa Kinazi byabagezagaho inkunga y’ibiribwa bitandukanye, imyambaro, ibikoresho, by’isuku n’ibindi.

Nyirinkindi Andre umusaza w’imyaka 82, avuga ko nubwo basize imitungo yabo muri Tanzania, ariko ngo barishimira uko babayeho ubu mu gihugu cyabo.

Ati “dore dufite umutekano usesuye, abana bacu bariga, turimo kubakirwa, abavandimwe baraduhora iruhande buri kanya baradusura. Rwose ubu ntacyo wampa ngo nsubire mu kindi gihugu ntavukamo.”

Habimana Valens, umuyobozi w’ibitaro bya Ruhango, avuga ko iki ari igitekerezo cyavuye mu bakozi b’ibi bitaro aho bishatsemo ubushobozi kugirango bafashe aba baturage bari birukanywe mu buryo butunguranye. Gusa ngo kubafasha ntibigarukiye aha kuko bazakomeza kubaba hafi.

Umunyamabanga nshingwabikorwa w’umurenge wa Kinazi, Mutabaza Patrick, avuga ko ubu hamaze gukorwa byinshi kugirango iyi miryango ituzwe neza ndetse bamwe bakaba baramaze gushakirwa imirimo ku bafite imbaraga. Aho bamwe bahawe ibisigara bya Leta bakaba baratangiye kubihinga.

Umurenge wa Kinazi urimo imiryango 6 yirukanywe muri Tanzania, ikaba igizwe n’abantu 28 baje baturutse mu nkambi ya Kiyanzi na Rukara nyuma yo kwirukanwa mu gihugu cya Tanzania.

Eric Muvara