Icyakora ngo kuba abaturage aribo bagize uruhare mu kwishyiriraho iki kigega ntibakwiye gucibwa intege n’abatifuza ibyiza bakora, kuko nta gihe ibi bitagaragaye; nk’uko bisobanurwa n’umuyobozi w’akarere ka Ruhango.

Tract ya mbere yatoraguwe iruhande rw’isoko rya Ruhango tariki 28/08/2012, itoragurwa n’abaturage.

Yarimo amagambo ashishikariza abaturage kudaha agaciro ikigega Agaciro Development Fund batagishyiramo inkunga, ngo kuko ntacyo kizabamarira.

Ikigega Agaciro Development Fund, cyavuye mu bitekerezo by’abaturage mu mushyikirano wabaye mu mwaka 2011, gitangizwa ku mugaragaro ku rwego rw’igihugu tariki 23/08/2012.

Umuyobozi w’akarere ka Ruhango, Mbabazi Francois Xavier, arasaba abaturage kudaha agaciro ibi bihuha, kuko ngo ntawe bikwiye gutera ubwoba; ngo ni kenshi byagiye bigaragara ariko ntibibuza Abanyarwanda gukomeza gutera imbere.

Mbabazi akomeza avuga ko ubu ikigiye gukorwa ari ugukomeza gushishikariza abaturage kwikorera badacibwa intege n’amagambo.

Mu karere ka Ruhango ikigega Agaciro Development Fund, cyatangiye ku mugaragaro tariki 30/08/2012, aho abaturage bafatanyije n’ubuyobozi bw’akarere bagishyizemo umusanzu usaga miliyoni 55.

Eric Muvara