Ibyo byabaye mu gitondo cyo kuri uyu wa Gatanu ariki 13/07/2012, ubwo bamwe mu banyeshuri bari bafite impushya zo kujya kwa muganga basohokaga ariko muri bo harimo abahungu batatu batazifite.

Gakumba w’imyaka 49, yakinguriye abafite uburenganzira bwo gusohoka, abasigaye nta mpushya bafite baba bagundaguranye nawe, bamuhirika ku rugi rumukomeretsa urutoki, undi amukubita ingumi yo mu gatuza.

N’ubwo yahise yihutira kwa muganga, Gakumba avuga ko yababajwe n’uko atabashije gufata amasura yabo yose, keretse umwe muri bo yibuka.

Philbert Uwayezu ushinzwe imyitwarire y’abanyeshuri muri iki kigo, yavuze ko bagiye gukurikirana abo banyeshuri, kugira ngo bahabwe ibihano. Yavuze ko mu bihe nk’ibi abanyshuri bategereje indangamanota zabo, biba bitoroshye kuko abenshi baba bashaka kujya kuzerera.

Bamwe mu banyeshuri bavuze ko ibi byose biterwa no kuba abanyeshuri bararangije ibizami ubuyobozi bukabangira gutaha.

Umwe muri bo ati: “None se ko twarangije ibizami, umuntu yakwicara hano mu kigo akora iki? Turi imfungwa se? ahubwo nibanareba nabi umuzamu umwe azahagwa!”

Aba banyeshuri biga muri iki kigo giherereye mu karere ka Ruhango, bifuza ko igihe ibizamini biba byarangiye bagomba kubareka bagataha, kuko kwirirwa bakingiranye mu kigo ngo bumva ari ukubahohotera.

Mu gihe kigera ku cyumwer abanyeshuri baba bategereje indangamanota zabo, usanga banyanyagiye hirya no hino mu mugi wa Ruhango, ku buryo hari abaturage babyinubira bavuga ko babateza akajagari.

Aba banyeshuri bifuza ko Minisiteri y’Uburezi ikwiye gukuraho itageko ryo guheza abanyeshuri mu bigo kandi ntacyo baba bahakora.

Eric Muvara