Babisabye kuri uyu wa 25 Nyakanga 2014, ubwo abadepite bagendereraga Umurenge wa Rugengabari mu rwego rwo gusobanurira abawutuye ibijyanye n’Itegeko Nshinga, maze mu byifuzo byabo, abaturage bakagaragaza ko bakifuza gukomeza kuyoborwa na Perezida Kagame.

Aba baturage babarirwa hagati ya 1000 na 2000, batangaje ko kugira ngo bakomeze kuyoborwa na we, ingingo y’101 y’Itegeko Nshinga yahinduka ariko kuri we wenyine. Abandi ngo bakajya bayobora manda ebyiri z’imyaka irindi.

Umwe muri abo baturage yagize ati “Kuri Nyakubahwa Paul Kagame ni ntakumirwa kuri manda zose, igihe azananirirwa abe ari we uzatubwira ko ananiwe. Abandi tuzajya tubatora igihe manda zirangiye, abatugiriye neza twongere tubatore, abatakoze neza tutabatora. Abandi ni (manda) ebyiri (z’imyaka) irindwi, irindwi.”

Aba baturage bifuza ko kandi abandi bayobozi bakurikira Perezida Paul Kagame, na bo bagera ikirenge mu cye bagakorera neza Abanyarwanda.

Bakomeza bavuga ko kuba bifuza gukomeza kuyoborwa na Perezida Kagame ari uko yabagejeje kuri byinshi birimo “Girinka” yatumye barushaho kugira imibereho myiza; nkuko Ngendambizi Jean de la Paix abisobanura.

Agira ati “Abanyarwanda hano murabona turakeye, tubikesha Paul Kagame…abaturage hano bose barakeye, basa neza, uku kuyaga ureba ni amata atugeraho.”

Uwineza Jean Marie Vianney, we ahamya ko Perezida Kagame yatumye bagira umutekano usesuye, ku buryo ngo bagenda nijoro ntacyo bikanga.

Agira ati “Mbere hari hari amateka mabi umuntu ntabwo yabaga yasohoka hanze bwije, habaga hari nk’ikintu cyamuhitana runaka, ariko ubungubu ijoro rirajyendwa, dufite ingabo ziturwanaho,…”

Abanyarugengabari kandi bakomeza bashimira Perezida Kagame watumye abasaza n’abakecuru bitabwaho. Aho muri gahunda ya VUP (Vision 2020 Umurenge Program) bahabwa amafaranga y’ingoboka.

Norbert NIYIZURUGERO