Mu nama yahuje akarere ka Rubavu, abakozi b’urwego rw’umuvunyi n’ikigo cy’igihugu gishinzwe imiyoborere myiza hamwe n’abaturage taliki 12/2/2014 abaturage bo mu karere ka Rubavu bagaragaje ibibazo bafite bitashoboye gukemurwa n’inzego z’ubuyobozi bw’ibanze hamwe n’inkiko.

Bamwe mu baturage bagaragaje ko ubuyobozi butabafasha neza mu gukemurirwa ibibazo ubundi ntibasobanurirwe inzira zikwiye banyuramo mu gucyemura ibibazo bagahora basiragira mu manza.

Twizeyeyezu Marie Josee, umuyobozi muri komisiyo y’amatora, avuga ko mu miyoborere myiza abayobozi basanga abaturage bakabakemurira ibibazo babaganiriza kuri gahunda zibateza imbere, bikaba bidakwiye ko umuturage ariwe ukora ingendo ashaka umuyobozi.

Mu gihe cy’ukwezi kw’imiyoborere myiza, inzego zitandukanye mu karere ka Rubavu zisanzwe zizenguruka imirenge zicyemura ibibazo by’abaturage ariko ngo hari ibiba bigoranye bicyeneye ubujyanama n’ubuvugizi bw’amategeko kuburyo inzego nkuru nk’urwego rw’umuvunyi ruza gufasha akarere gushakira umuti ibibazo abaturage baba bafite.

Hagendewe ku murongo munini w’abaturage barimo bashaka kugaragaza ibibazo, abaturage benshi bagaragaza ko ibibazo byabo batabigeza ku nzego z’ibanze ngo bikemurwe uko bikwiye, abandi bagahura n’ikibazo cyo kutamenya inzego bagana ngo bakemurirwe ikibazo aho kutamenya amategeko bituma basiragira mu nzira.

Ibindi bibazo byagaragajwe ni aho bamwe mu baturage bagize akarengane bikozwe n’inzego zibayobora nk’icyagaragajwe na Rwivuruga wagabanyirijwe ikibanza acururizaho mu isoko mu gihe yari amaze kugira ibyago byo gupfusha umugore ubuyobozi bw’isoko bukamugabanyiriza ikibanza.

Umukozi w’urwego rw’umuvunyi, Rumaziminsi Selaphin, avuga ko kubura umuntu mu muryango bitavuze ko umuntu yamburwa uburenganzira bwe.

Ibindi bibazo byagaragajwe cyane ni ibirebana n’imanza z’ubutaka n’ibibanza aho bamwe bavuga ko akarere kabambuye ibibanza bivuye mu myanzuro y’inama njyanama y’akarere, ubuyobozi bw’akarere ka Rubavu busabwa gufasha abaturage kubona ibyo bibanza.

Inama yari yitabiriwe n’abaturage benshi bashima uburyo gukemurira ibibazo mu ruhame bikuraho amakenga ndetse umuturage agataha ashubijwe n’abandi babibona nta rwego aveba ko rumurenganyije ahubwo igisubizo atahana kiba giciye mu kuri.

Mukamana utuye mu murenge wa Nyakiriba wari witabiriye iyi nama yari yahuje imirenge ya Nyundo, Nyakiriba na Kanama ashima uburyo abaturage bashoboye kugaragaza ibibazo bafite. Ati “twishimiye ko ubuyobozi butwegera bugakemurira ibibazo mu ruhame kuko ntawe utahana ingingimira, rwose iyi ni imiyoborere myiza bizahoreho.”

Abajijwe impamvu abaturage bagaragaye ari benshi ku mirongo, Mukamana avuga ko abaturage baba bashaka kubariza ibibazo mu ruhame kuko bizera ko ibisubizo bahwa bibafasha, cyakora bamwe mu batanga ibibazo bavuga ko bakeneye gufashwa mu mibereho nkuko byagaragajwe n’umusaza Mugemana Pascal wavuye mu murenge wa Bigogwe akarere ka Nyabihu uvuga ko atunzwe n’abagira neza ashaka ko akarere kagira icyo kamufasha.

Sylidio Sebuharara