Abaturiye Sebeya basabwe kuhava bagashaka ahandi batura

Nzabonimpa Deogratias, Umuyobozi w’Agateganyo w’Akarere ka Rubavu, abitangaje mu gihe abaturage baturiye umugezi wa Sebeya bamaze gushyirirwaho ingufuri kugira ngo bimuke.

Nzabonimpa avuga ko babasabye kwimuka byihuse mu gihe habura ibyumweru bibiri imvura igatangira kugwa, bakaba batinya ko hari abo yahitana nk’uko byagenze mu ntangiriro z’ukwezi kwa Gicurasi 2023 ubwo imvura yaguye, umugezi wa Sebeya ukuzura ugasenya inyubako nyinshi ndetse ugatwara ubuzima bw’abantu.

Agira ati « Abantu bagombye kuba badatuye ahantu hashyira ubuzima bwabo mu kaga kandi turagendera ku nyigo yakozwe n’impuguke igaragaza ahashyira abantu mu kaga, ikigomba gukorwa ni ukwimura abantu twirinda ko hari abo amazi yatwara ubuzima. »

Uyu muyobozi akomeza avuga ko mu byumweru bibiri imvura ishobora kugwa hakaba hari abo yahitana.

Ati «Mu byumweru bibiri turaba twakira imvura nyinshi kandi yatera ibiza. Bimwe mu biri gukorwa ni ukureba ahantu hose hashobora gushyira mu kaga abantu bakahakurwa, si mu Karere ka Rubavu konyine gusa, ni mu gihugu cyose, hagamijwe gutabara ubuzima bw’abantu barindwa impfu za hato na hato. »

Abaturage baturiye Sebeya basabwa kwimuka bagashaka ahandi batura naho ubutaka bwabo buzaguma ku nkengero za Sebeya bagashaka ikindi bahakorera ariko kitabashyira mu kaga.

Itariki ya nyuma yo kwimuka ku baturiye Sebeya yari 10 Kanama 2023. Nyuma y’uko igeze, abaturage bakorera muri metero 10 kuri Sebeya bashyiriweho ingufuri kugira ngo bashake ahandi bajya gutura, mu gihe abatishoboye basanzwe bafashwa na Leta barimo gufashwa n’Akarere ka Rubavu kwishyura ubukode mu gihe cy’amezi atatu.

Umuyobozi w’Agateganyo w’Akarere ka Rubavu, Nzabonimpa, avuga ko hari gutegurwa ahantu hazatuzwa abarimo kwimurwa kuri Sebeya.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )