Mu nama yabaye hagati ya Bralirwa n’intara y’uburengerazuba tariki 10/10/2012, hemejwe ko iyo miryango 15 izimurwa igahabwa ibibanza ahandi kandi igafashwa kubona isakaro.

Iyo miryango niyo ifite ikibazo cyihariye kuko yegereye cyane inkengero z’umugezi kandi ikaba yangirizwa uko imvura iguye. Uruganda rwa Bralirwa kandi rwemeye kuzongerera gutunganya uwo mugezi kugira ngo byorohere amazi gutambuka arekere aho kwangiriza abawuturiye.

Mu gutunganya uyu mugezi uruganda rwa Bralirwa rwemeza ko rushobora kuzakoresha amafaranga agera kuri miliyoni 250.

Ibiganiro byo gukemura ikibazo cy’abangirizwa n’umugezi biri mu byo Minisitiri w’Intebe Dr.Pierre Damien Habumuremyi yasabye tariki 28/09/2012 ubwo yasuraga uyu mugezi wasenyeye abaturage baturiye Bralirwa.

Minisitiri w’Intebe kandi yasabye ko inkomoko y’umugezi (amazi aturuka ku muhanda wa Kiraga-Burushya) yayobowe nabi yasubirwamo kugira ngo yo koherezwa mu ngo n’imyaka y’abaturage.

Mu kwirinda ibiza biterwa n’amazi abubaka ku nkengero z’ikiyaga cya Kivu bagomba kubahiriza amategeko nubwo hari abubatse batabyubahirije.

Sylidio Sebuharara