Icyakora n’ubwo muri ayo mabaruwa handisemo ko basezeye ku bushake bwabo no ku mpamvu zabo bwite, hari ababwiye itangazamakuru ko gusezera babihatiwe.

Umwe mu banditse basezera yabwiye Kigali Today ati “Twaje mu nama ya JOC ku Karere, ubusanzwe yitabirwa n’Abanyamabanga Nshingwabikorwa b’Imirenge ariko natwe baraduhamagaye. Ni inama yari iyobowe n’umuyobozi w’akarere wungirije ushinzwe ubukungu n’iterambere hamwe n’umusirikare ufite ipeti rya Majoro n’umuyobozi wa Polisi mu Karere. Inama igeze hagati, umuyobozi w’akarere wungirije yatangiye guhamagaza abanyamabanga nshingwabikorwa b’utugari agaragaza amakosa yabo ndetse akabasaba gusohoka, bagakurikira umuyobozi w’Akarere ushinzwe imirimo rusange (DM) wari ufite impapuro.”

Avuga ko bageze mu biro bya DM abasaba kwandika basezera akazi birabatungura kuko umukozi wa Leta hari uburyo yirukanwamo.

Aba bakozi bavuga ko bamwe bagerageje kubyanga bashyirwaho igitutu n’umuyobozi ushinzwe abakozi hamwe n’umuyobozi ushinzwe imirimo rusange babashyiraho iterabwoba bababwira ko banze kwandika bazabasanga mu mirimo kandi ko hatabura ibyaha bibafungisha.

Bavuga ko abahatiwe gusezera akazi ari barindwi ariko bagombaga kuba umunani harimo n’uwo mu murenge wa Kanama basanze ari mu kato ka COVID-19 ntiyitabira inama.

Abasabwe gusezera akazi bamwe bakomeje imirimo bavuga ko babimenyesheje ubuyobozi bw’Intara na Minisiteri y’Ubutegetsi bw’Igihugu bategereza icyo bafashwa, ariko abandi ntibayisubiyeho bavuga ko bategereje ko Akarere kabasubiza.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )