Icyumweru gishize mu karere ka Rubavu imirenge ihana imbibe n’ibihugu cya Congo yibasiwe n’ibisasu bivuye ku butaka bwa Congo, ibyarashwe mu mujyi wa Gisenyi bihitana umubyeyi w’imyaka 44 bikomeretsa umwana we ndetse bikomeretsa n’abandi bantu babili.

Ibi bisasu byatewe mu karere ka Rubavu byakuye umutima abaturage, ndetse Leta y’u Rwanda ifata icyemezo cyo kurinda umutekano w’abaturage bayo, aho hoherejwe ibikoresho bya gisirikare n’ingabo zigomba kurinda ubusugire bw’igihugu biyongera ku bari bahasanzwe.

Bamwe mu baturage batuye mu murenge wa Bugeshi k’umupaka wa Kabuhanga bari barakutse imitima kubera ibi bitero bavuga ko koherezwa kw’izi ngabo n’ibikoresho byatumye umutima utekana.

Abaturage bavuga ko izi ngabo zaciye agasuzuguro kuko nta kindi gisasu cyongeye kuraswa mu Rwanda nk’uko Mark Ndabakize yabitangaje .

Yabisobanuye muri aya magambo: “twahoraga dufite ubwoba bw’ibisasu bigwa ku butaka bwacu, ariko kuva ingabo zakoherezwa ubu ibisasu byarahagaze yewe n’intambara yarahagaze ubu turatuje twasubiye mu mirima yacu nta kibazo.”

Kuva u Rwanda rwatangaza ko ruzakurikirana abarasa ku butaka bwabo, Leta ya Congo yashinjije inyeshyamba za M23 ariko M23 nayo ihakana ko ariyo yabikoze ndetse ivuga ko kugirango yorohereze iperereza kuri ibyo biasu, maze isubira inyuma aho yariri.

Kuva taliki 30/08/2013, M23 yavuye mu birindiro byayo Kibati ijya mu misozi ya Kirimanyoka, Kamahura na Kibumba, ubu umutuzo waragarutse ndetse n’amasasu yarahagaze abaturage batangira gusubira mu mirimo yabo.

Sylidio Sebuharara