Uku gutabaza kuje nyuma y’uko tariki 11/09/2012 imiryango 40 ituye mu mudugudu wa Rambo akagari ka Kiraga umurenge wa Nyamyumba yangirijwe n’amazi yanyujijwe muri iyo nzira yubatswe na Bralirwa.

Bralirwa yo ivuga ko ibyo abaturage bavuga atari byo ahubwo nyirabayazana w’ikiza ari ikorwa nabi ry’umuhanda wa Kiraga-Burushya wubatse mu gahinga aho amazi yanyujijwe mu nzira idakwiye akamanukana ingufu zituma asenyera abaturage kandi akaba yarangirije n’uruganda rwa Bralirwa.

Nyangezi Freddy, umuvugizi w’uruganda rwa Bralirwa, avuga ko Bralirwa ari umuturage wangirijwe nk’uko abandi baturage bangirijwe n’ikiza ahubwo agasaba gufatanya n’abaturage n’ubuyobozi kugishakira igisubizo.

Nyangezi avuga ko kuba Bralirwa yaranyujije umugezi mu baturage kandi ntibasige na metero zagenwe atari amakosa ya Bralirwa.

Bralirwa yakuye umugezi mu ruganda iwushyira hamwe yarwo ariko irawubakira, ikibazo cyavutse kubera ko amazi yaje ari menshi afite umuvuduko udasanzwe akuzura agasandara mu baturage ndetse benshi mubaba mu macumbi ya Bralirwa bangirijwe.

Ku kifuzo cy’abaturage basaba kwimurwa kubera ko uyu mugezi usenyeye abaturage inshuro nyinshi, Bralirwa ivuga ko nk’umuturage idafata icyemezo ahubwo inzego zibanze zikwiye kubifatira umwanzuro.

Umunyamabanga nshingwabikorwa w’umurenge wa Nyamyumba, Habimana Martin, avuga ko ari ikibazo kizaganirwaho n’akarere na REMA ku buryo abaturage bakwimurwa Bralirwa nayo ikaba yakwagura uruganda.

Martin avuga ko ubu icyo bihutira ari ukuzibura inzira y’amazi ndetse bagashobora kuyagura mu bikorwa by’umuganda birimo gukorwa.

Mu gikorwa cy’umuganda cyabaye kuri uyu wa kane tariki 13/09/2012 habonetse n’umurambo wa Rugeruza Jean Damascene wari usanzwe apakira umucanga mu cyambu warohamye kubera amazi.

Ikibazo cy’ibiza mu karere ka Rubavu birigaragaza cyane, kuko hari undi mugezi witwa Sebeya uva muri Rutsiro ukazana isuri iterwa n’aho abaturage bacukura amabuye i Nyamyumba.

Sylidio Sebuharara