Nyuma y’umuganda ngaruka kwezi mu karere ka Rubavu witabiriwe n’itsinda ry’Abasenateri icumi bari bayobowe na Vice Perezida w’Inteko ishingamategeko wa Sena, Senateur Gakuba Jeanne d’Arc, wibukije abaturage ko taliki ya 1/2/2014 hateganyijwe igikorwa cyo kwibuka Intwari z’Igihugu.

Hon. Senateur Jeanne d’Arc avuga ko buri mu nyarwanda wese yakagombye guharanira kuba intwari, kuko Intwari z’ u Rwanda zaba izizwi ndetse n’izitazwi zakoze akazi gakomeye kugira ngo igihugu kigere aho kigeze, kandi ko nabandi bagomba guharanira kuba intwari kuko bishoboka, buri wese yitaye kuri gahunda ya Ndi umunyarwnada nk’uko insanganyamatsiko y’uyu mwaka igira iti « Ndi umunyarwanda Inkingi y’Ubutwari.»

Hon. Senateur Jeanne d’Arc avuga kuri Ndi umunyarwanda, ngo iyi gahunda izatwara imyaka myinshi, kuko n’umwana muto w’umunyarwanda agomba kuyigishwa ndetse akwigishwa kirazira mu muco Nyarwanda no guha agaciro gahunda za Leta y’u Rwanda.

N’ubwo akarere ka Rubavu kadafite ikibazo cy’ibiribwa, Hon. Senateur Jeanne d’Arc yasabye abaturage guharanira ko bakwihaza mu biribwa ndetse bagashobora kubona nibyo bashobora ku isoko nkuko babigenza bagaburira umujyi wa Goma, avuga ko kwiteza imbere neza bijyana no kugira igenamigambi ry’umuryango, asaba abaturage bo mu karere a Rubavu kubyara abo bashoboye kurera.

Uyu muganda wibanze ku gikorwa cyo kubungabunga umugezi wa Nyaruhonga uri mu muudugudu wa Nyaruhonga, Akagari ka kiraga, umurenge wa Nyamyumba ahatewe ingemwe z’ibiti bivangwa n’imyaka, ku nkengero z’umugezi no ku nkengero z’ikiyaga cya kivu zigera ku bihumbi makumyabiri.

Umuyobozi w’Akarere, Sheik Bahame Hassan avuga ko abaturage ayobora bitwaye neza mu bibazo by’umutekano akarere kagize ubwo bahohoterwaga n’abanyecongo ariko bakabyihanganira, avuga ko bakomeza kurangwa n’umuco wo gukunda igihugu batanga amakuru ku gihe, atangaza ko korohereza abayobozi b’imidugudu gutanga amakuru bose bazashyirwa muri CUG (gahunda iborohereza gutanga amakuru) z’Uturere mu gihe kitarenze icyumweru kimwe.

Sylidio Sebuharara