Umwana w’imyaka 12 witwa Manishimwe avuga ko iyo yiriranywe umwana ahembwa amafaranga 300 ku munsi.

Manishimwe utazi gusoma no kwandika, avuga ko umubyeyi we na we abyuka ajya i Goma gucuruza amasahani, ngo iyo amubwiye ibyo kwiga amusubiza nabi ko atagomba kujyayo.

Aho abo bana bakunda kwirirwa hitwa ku madepo hegeranye n’umupaka muto uhuza Gisenyi na Goma; impinja ziharererwa ziba zirambitse hasi, izindi zirira, izindi zaburiwe imyenda yo guhindurirwa, abato badahekwa inzara yabishe barize bageraho bagaceceka.

Abagore bakorera hafi aho bacuruza amakara batangaza ko abo bana bateye agahinda ku buryo hari ababagirira impuhwe bakabaterura cyangwa bakabagurira amata inzara yabishe. Abo bagore bemeza ko ba nyina b’abo bana baba batabanze ahubwo ko batahagarika akazi kandi ari ko kabatunze.

Kubuzwa kugendana abana byo ngo barabishyigikiye kuko wasangaga iyo ba nyina bahohotewe i Goma bashobora gukubita umwana hasi n’ibindi bibazo byinshi.

Umuyobozi wungirije w’akarere ka Rubavu ushinzwe imibereho myiza y’abaturage, Nyirasafari Rusine Rachel, atangaza ko iki kibazo akarere kakizi kandi ko bafashe icyemezo cyo kubumbira abo bagore muri koperative hanyuma bakabashakira ahantu bazajya basiga abana na bo bagashaka abagore bazajya babarerera bakabishyura.

Ku bibazo cy’abana babuzwa uburenganzira bwabo bwo kwiga bakirirwa bareze izo mpinja, umuyobozi wungirije wa Rubavu yatangaje ko mu gihe cya vuba ubwo abo bagore bazaba babonewe aho gusiga abana, n’abo barezi babo bazahita bashaka imirenge yabo bakajyanwa mu ishuri.

Pascaline Umulisa