Iyi nama isanzwe iba mu mpera z’umwaka, kuri uyu wa gatandatu hari ibyo yaganiriyeho mu ruhame, ibindi bishyirwa mu muhezo w’itangazamakuru; ariko Perezida wa Repubulika, akaba n’Umukuru w’Umuryango wa RPF-Inkotanyi, ni nk’aho yanyuze mu byaje kuganirwaho byose mu ijambo riyitangiza.

Perezida Kagame ari nawe muyobozi w’umuryango FPR-Inkotanyi yatangaje ko uyu muryango wiyemeje kurwanya abataye umuco ariko ukanongera imbaraga mu guteza imbere Abanyarwanda.

Hari abayobozi RPF ngo ibona ko bataye umuco ntibubahirize inshingano zabo, “bakaba muri RPF ari nko gusembera” (bayibamo batayirimo), aho bagera aho bagahunga igihugu, nk’uko Perezida Kagame yabitangaje

Yagize ati “Twagiye tugira abanyamuryango barimo n’abakomeye batiyubaha, badakunda abo bayobora n’ibyo bakora akaba ari inyungu zabo bwite; mwambwira mute ukuntu umuntu ahunga igihugu ataye inshingano, ngo ni uko hari uwo bakorana batumvikana! Ubwo ni ubwenge buke; turi hano ku bw’inyungu rusange, ubuzima bwa RPF ntibwahagarara”.

Madamu Jeanette Kagame nawe yari mu banyamuryango bitabiriye biro ya politikie ya FPR-Inkotanyi.

Ubukungu ngo bugomba kwikuba kabiri

Perezida wa Repubulika yabwiye abarenga ibihumbi bitatu bagize Biro politiki y’Umuryango guhera ku rwego rw’umurenge kuzamuka, bakaba ari bo bayobozi b’igihugu muri rusange; ko n’ubwo u Rwanda rukomeje guhabwa amanota meza mu ruhando mpuzamahanga; aho ruva ngo ni kure cyane ku buryo buri wese akeneye gukora kugira ngo ubukungu burusheho kuzamuka.

Ati “Niba (ni urugero) ubukungu bwarazamutse ku kigero cya 6% mu mwaka ushize mu gihe ahandi batagejeje no kuri 1%, birashimishije ariko ntitwakwirengiza ko bo bafite aho bageze kera; twe turava kure n’ubwo tuzamuka byihuse; wakwibaza impamvu abo batazamuka kuri 1% ari bo bagaburira abazamuka ku kigero cya 8%.

Akanyamunezaneza kari kose ku banyamuryango ba RPF-Inkotanyi.

Yakomeje agira ati “Haribazwa icyakorwa kugira ngo igipimo cya 6% cyikube kabiri; byose birava mu bikorwa byacu twebwe abayobozi, ntabwo biva mu gushyiraho imibare.”

Imibereho myiza: Perezida wa Repubulika ku kibazo cy’amavunja, bwaki, ubujura mu ngo, impanuka, ruswa n’ihohoterwa

Perezida w’umuryango RPF-Inkotanyi iyoboye igihugu, avuga ko yatangajwe cyane no gusanga abantu barwaye amavunja, abana bambara imyenda isa nabi, hari n’abaturage bafite umwanda ukabije. Ntiyishimiye kandi ko abayobozi bigira ntibindeba ku kibazo cy’impanuka, ihohoterwa n’icuruzwa ry’abana, abarwaye bwaki ndetse n’abantu barara bahagaze kubera ubujura bubera mu ngo.

Umurango FPR-Inkotanyi ufite intego yo gukuba kabiri ibyakozwe mu iterambere ry’abaturage, umutekano n’ubukungu.

Ati “Bayobozi b’uturere, murasobanura icyo muhugiyemo kiruta ibyo bibazo; biragaragara ko tutabana n’abo tuyobora; hari byinshi bishobora gukorwa, ariko byose bihera ku muco, ubushake no kwiyoroshya, kuko uwiremereje cyane iyo aguye arameneka.”

Abanyamuryango bakuru ba RPF bunguranye ibitekerezo nyuma y’ikiganiro cyatanzwe na Ministiri w’imari n’igenamigambi, Amb Claver Gatete, aho yarondoye ibigomba gukorwa ku iterambere ry’icyaro; birimo kuzamura ubukungu hashingiwe ku kongera ibikorwaremezo, umusaruro w’ibiribwa, gushaka imirimo ndetse n’ikoreshwa neza ry’umutungo kamere w’igihugu.

Za Ministeri z’Ubuhinzi n’ubworozi, Ubuzima, Ubutegetsi bw’Igihugu n’imibereho myiza y’abaturage, ndetse n’ishinzwe Uburinganire n’iterambere ry’umuryango; ziyemeje gukurikirana ikibazo cy’imirire mibi, umwanda, umusaruro muke w’ubuhinzi ndetse no guta amashuri kw’abana; aho buri rugo rwo mu Rwanda ngo rugiye kugenzurwa.

Simon Kamuzinzi