Abageze mu za bukuru bo mu murenge wa Ririma bo mu tugari twa Ntarama, Kimaranzara ndetse na Karera ahatuwe kuri ubu n’abategereje kuzimurwa mu mbago z’ikibuga mpuzamahanga cy’indege cya Bugesera baratangaza ko kuba bashyingura kure cyane y’aho batuye ari ikibazo kibakomereye nk’uko bivugwa na Gasangwa Daniel.

Aba baturage bo mu tugari dutatu twa Ririma bavuga ko batambika umurambo uri mu isanduku ku magare abiri bakagenda basunika urugendo rugafata amasaha abiri ngo abapfushije kubera intege nkeya ntibaherekeza ababo aho bagiye kubashyingura.

Mukaneza Berthlide akaba yagize ati “ kubona imodoka zitwara umurambo si benshi babyigondera kandi gushyingura umuntu mu gihe gito ukazumva ngo imashini ziriho zihinga kugira ngo batunganye ikibuga mpuzamahanga nabwo wababara kuko wakumva ko uwawe yataburuwe”.

Avuga ko kandi imvune n’imibabaro bafite zizashira ari uko abo baturage bimuwe kuri ubwo butaka bw’ikibuga cy’indege, ari na byo basaba buri gihe.

Ubuyobozi bw’ako karere ka Bugesera butangaza ko ikibazo cy’abo baturage bugikurikiranira hafi kuko burimo gushaka uburyo abo baturage bahabwa amafaranga maze bakajya aho bwabateganyirije kuzimurirwa.

Egide Kayiranga