Iki gikorwa kigaragaza intambwe igisirikare cy’u Rwanda kimaze kugeraho kuva mu myaka ishize cyatangira kohereza ingabo zo kubungabunga amahoro mu bihugu bitandukanye ku isi, nk’uko byatangajwe na Maj. King Kayondo, uzaba uhagarariye ibi bitaro.

Yagize ati “Birerekana ko u Rwanda rufite ishusho nziza mu mahanga ariko bikerekana n’ubushake bwo gufasha Umuryango w’Abibumbye aho bishoboka, kuko ni ubwa mbere ubutumwa nk’ubu bugiye kuba. Ni ukuvuga ko badufitiye icyizere ko dushobora gukora kiriya gikorwa kandi dufite abantu babishoboye, kandi dufite n’ibikoresho bishobotse kugira ngo tujye muri ubu butumwa bwa UN”.

Iyi kipe y’abaganga izagenda yitwaje ibikoresho bitandukanye byo gushinga ibitaro byo ku rwego rwa kabiri (biri ku rwego rw’ibitaro by’akarere) nk’uko UN ibiteganya. Bizaba bifite ubushobozi bwo kubaga muri rusange no kubaga amagufa n’ibikoresho byo kumenya indwara bigezweho (Radiologie).

Ibi bitaro kandi bizaba biherekejwe n’ikipe y’abaganga b’inzobere n’abatekinisiye bagera kuri 69, bikazajya bigirira akamaro abakozi ba UN, abasirikare b’u Rwanda n’abandi bose bari mu butumwa, ariko u Rwanda rukazarenzaho umwihariko wo kuvura abaturage.

Biteganyijwe ko abaganga bazatangira kugenda nyuma y’ibyumweru bitatu ibikoresho bigezeyo, kuko byo byatangiye kugenda kuwa kabiri tariki 20/1/2014. Biteganyijwe ko abazaba bakora muri ubu butumwa bazamarayo igihe kigera ku mwaka ariko gishobora kongerwa.

Emmanuel N. Hitimana