Umuyobozi wa Polisi y’u Rwanda aravuga ko abo ayobora barimo abarya ruswa benshi

DCG Munyuza avuga ko mu myaka itatu ishize Polisi imaze gusezerera, kubera ruswa, abayikoreraga bagera kuri 300 barimo 70 bari abapolisi bakuru.

Ibi yabitangaje mu gusoza icyumweru cyahariwe kurwanya ruswa mu nzego zitandukanye zigize igihugu kuri uyu wa gatandatu, ndetse no kwizihiza umunsi mpuzamahanga wahariwe kuyirwanya uba buri wa 09 Ukuboza.

Polisi y’Igihugu ni rumwe mu nzego zigize Inama ngishwanama ku kurwanya ruswa n’akarengane, ndetse ku bufatanye n’Urwego rw’Umuvunyi, bategura inama ngarukamwaka isuzumirwamo uko ruswa yifashe mu gihugu.

DCG Dan Munyuza agira ati:”Hari umushyitsi uba muri Amerika wageze ku kibuga cy’indege(i Kigali) yibagirwa igikapu cy’amafaranga menshi, ariko umupolisi wagitoye amaze kukimusubiza yarishimye cyane ndetse ashimira Polisi y’u Rwanda”.

“Nyuma y’amezi make uwo mushyitsi yaragarutse anyura ku bapolisi ninjoro, umwe muri bo aramubwira ati ‘iyi mbeho ntimuyibona! Gira akantu aduha. Yarababaye cyane aravuga ati ‘ese ubu noneho ndavuga iki! Wowe ugomba kuba utari muri babandi!”

“Ingero nk’izi ni nyinshi, iyo bibaye hari igihe ucika intege ukavuga uti ‘Polisi iratunaniye’, urebye umubare w’abapolisi birukanwa buri mwaka kubera amafaranga ibihumbi 50, birababaje kuko Leta iba yabatanzeho byinshi”.

Umuyobozi Mukuru wa Polisi yijeje inzego zitandukanye ko umupolisi wese wakiriye ruswa ahabwa ibihano birimo gufungwa no kwirukanwa burundu mu kazi.

Avuga ko abapolisi benshi bakira ruswa biganje mu barinda umutekano wo mu muhanda no mu bakoresha ibizamini byo gutwara ibinyabiziga.

Akarere ka Kirehe mu twa mbere twitabira gushyiraho ingamba zo kurwanya ruswa

Ku rundi ruhande Urwego rw’Umuvunyi ruravuga ko hari uturere tutabyaza umusaruro Inama ngishwanama zashyiriweho kurwanya ruswa, bigatuma abayifata n’abayitanga batamenyekana.

Mu turere tutatanze raporo y’uyu mwaka harimo aka Gisagara, Gicumbi, Huye, Kamonyi, Kicukiro, Musanze, Nyagatare, Nyanza, Nyarugenge, Nyaruguru na Ruhango.

Polisi hamwe n’Urwego rw’Umuvunyi bakanguye inzego zitandukanye kugira ngo zifate ingamba zo gukumira ruswa

Mu turere twa mbere dutanga raporo ndetse twanabiherewe ibihembo, harimo Kirehe kaje ku mwanya wa mbere inshuro ebyiri zikurikirana, hakaba na Gatsibo na Nyamasheke ku mwanya wa kabiri n’uwa gatatu.

Muzungu Gerald uyobora akarere ka Kirehe avuga ko kuba inama ngishwanama yo kurwanya ruswa irimo inzego z’iperereza, ngo bibafasha kumenya ahatangirwa ruswa, ndetse abayakiriye(atavuze umubare) bagiye kugezwa mu butabera.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2464 )