Muri iryo jambo rye ryifurizaga Abanyarwanda umwaka w’ibyiza n’iterambere wa 2016, yibukije ko umwaka wa 2015 wabayemo byinshi kandi byagiriye Abanyarwanda akamaro.

Perezida Kagame yatanze impano y’ubunani avuga "YEGO" ishimangira ibyavuye muri Referandumu.

Yagaragaje ko ibyo byose byarushijeho kunga ubumwe bw’Abanyarwanda mu kubaka igihugu cyabo. Yagize ati "Ubumwe bw’Abanyarwanda burakomeye, ntibujegajega kandi umurimo wo kubaka igihugu urihuta."

Yakomeje avuga ko ari yo mpamvu Abanyarwanda bahisemo kuvugurura Itegeko Nshinga binyuze mu referandumu bahitamo ahazaza bifuriza u Rwanda.

Yagize ati "Mwansabye kuzakomeza kuyobora igihugu nyuma ya 2017. Nkurikije uburemere bwabyo n’imyumvikanire mwabihaye nta kuntu ntabyemera."

Perezida Kagame ariko yagaragaje ko atifuza kuyobora igihugu ubuziraherezo nk’uko hari ababimusabaga. Ati "Nizere ko bitari ugushaka umuyobozi uzakomeza kuyobora igihugu ubuziraherezo, kandi nanjye si ko mbyifuza."

Aha ni ho yahereye avuga ko bitari cyera cyane inshingano z’umwanya wa Perezida zizagera ubwo zihererekanywa ku buryo bizagira akamaro n’impamvu, ngo "bireze kuba urugero gusa byaba ku Banyarwanda cyangwa no ku bandi".

Perezida Kagame yifuje kandi ko Abanyarwanda bakomeza inzira batangiye yo guhindura igihugu cyabo, avuga ko Abanyarwanda bafite icyizere cy’ejo hazaza kandi bishimira inzira bahisemo.

Yakomeje avuga ko ibyo bikwiye guha inshuti z’u Rwanda n’abafatanyabikorwa barwo icyizere kandi ko n’abanenga u Rwanda, byaba biturutse ku kutarwumva neza cyangwa kudashaka kumva na byo ngo bishobora kuba intangiriro y’ibiganiro bituma bose bumvikana.

Yagize ati "Nidukomeza gufatanya tugakomeza inzira turimo ntacyatubuza kugera ku ntego yacu."

Perezida Kagame akaba yoseje ijambo rye risoza umwaka wa 2015 yifuriza Abanyarwanda bose, mu izina rye n’iry’umuryango we, umwaka mushya muhire wa 2016.

K2D