Umukuru w’igihugu yabibasabye kuri uyu wa gatanu tariki 19/10/2012, ubwo yatangizaga igikorwa cyabaye ngarukamwaka cyiswe “Meet the President”, cyo guhura n’urubyiruko bakaganira ku ngingo zirebana n’ubuzima bw’igihugu muri rusange.

Perezida Kagame yagize ati: “Niba wicaye utegereje ibyo abandi baguha, uzategereza ubuziraherezo. Ikindi ni uko uwigize agatebo ayora ivu”, akaba yabivuze ubwo yasobanuraga insanganyamatsiko y’uyu mwaka yiswe “kubaka umurage wo kwishakamo ibisubizo”.

Abanyafurika bagomba guhaguruka bakivuganira, bakanikorera kuko utabikoze “agereranywa n’indogobe, aho kuba utwara iyo ndogobe”; nk’uko Umukuru w’igihugu yasabye urubyiruko rwiga guhuza imvugo n’ibikorwa.

Abanyeshuri baturutse mu bigo by’amashuri makuru na za kaminuza zitandukanye, bagiye bagaragariza umukuru w’igihugu impungenge zishingiye ku kutabona imirimo iyo barangije amashuri, abasubiza ko icyabahuje nawe ari ibyo bibazo nawe asaba abaturage gukemura, bashingiye ku guhera kuri bike bafite.

Ikibazo cy’intambara ibera mu burasirazuba bwa Kongo nacyo cyagarutsweho muri iyi nsanganyamatsiko ijyanye no kwishakamo ibisubizo, aho Perezida Kagame yavuze ko iyo ntambara iterwa no kutamenya kwikemurira ibibazo kw’abanyagihugu ba Kongo, ahubwo bakabigereka ku Rwanda.

Ati: “Ibi ni nabyo bigaragara ku muryango mpuzamahanga ukomeje kugereka amakosa ku Rwanda, kandi uzi neza ko rutigeze rugira uruhare mu gushyira abaturage bavuga ikinyarwanda muri Kongo”.

Umukuru w’igihugu yanagarutse ku ntsinzi u Rwanda rwegukanye mu muryango w’abibumbye kuri uyu wa kane tariki 18/10/2012, yo kuba umwe mu banyamuryango b’akanama gashinzwe amahoro n’umutekano ku isi, aho yavuze ko u Rwanda rubonye uwo mwana ruwukwiye.

“Meet the President” ibaye ku nshuro ya mbere muri uyu mwaka, yitabiriwe n’urubyiruko 2,500 rwaturutse mu bigo 32 byo mu Rwanda no hanze y’u Rwanda mu Burundi, Sudani y’epfo na Repubulika iharanira Demokarasi ya Congo.

Guhura na Perezida wa Repubukika kw’abanyeshuri cyangwa se urubyuruko muri rusange, byemejwe ko bigiye kuba igikorwa ngarukamwaka.

Simon Kamuzinzi