Ba Ambasaderi bakiriwe kuri uyu wa 15 Nzeri 2015, ni abahagarariye ibihugu bya Iran, Benin, Autriche, Australia, Ireland, Argentine, Ubutaliyani n’Ubuyapani.

Perezida Kagame yakira impanuro zemerera ambasaderi Kiyozaki gukorera mu Rwanda.

Abakiriwe bose bagaragarije Umukuru w’igihugu imigambi bafite muri manda yabo, mu rwego rw’ubufatanye hagati y’u Rwanda n’ibihugu byabo.

Amabasaderi Donal Cronin uhagarariye Ireland, yavuze ko igihugu cye kizongera ubufatanye n’u Rwanda mu by’ubucuruzi butandukanye. Yongeyeho ko abaturage ba Ireland bakunda cyane kunywa icyayi cy’u Rwanda kubera uburyohe bwacyo, ubucuruzi bwacyo bukaba buri mu bizongerwamo ingufu.

AMbasaderi Dominico Fornara yerekwa akarasisi k’abasirikare aje gushyikiriza Perezida Kagame impapuro zimwemerera guhagararira u Butaliyani.

Ireland ni cyo gihugu cya mbere cyemeye ku mugaragaro Leta y’Ubumwe bw’Abanyarwanda nyuma ya Jenoside yakorewe Abatutsi mu 1994.

Uwari Perezida w’iki gihugu muri kiriya gihe, Mary Robinson, ni we mukuru w’igihugu wa mbere wasuye u Rwanda Jenoside ikimara guhagarara.

Ambasaderi Donal Cronin niwe uzahagararira Ireland.

Uhagarariye Ubuyapani, Ota Kiyokazi, yavuze ko mu biganiro yagiranye na Perezida wa Repuburika, byibanze ku mishinga migari ibihugu byombi bizafatanya.

Yagize ati "Tuzakomeza gufatanya mu by’umutekano, uburezi, ibikorwa by’amajyambere ndetse n’iterambere ry’abagore".

Iki gihugu kandi ngo kizaha u Rwanda inguzanyo ingana na miliyoni 60 z’amadolari y’Amerika azafasha mu gusana umuhanda Kayonza-Rusumo. Aya mafaranga ngo akazatangwa mu mpera z’uyu mwaka wa 2015.

Ambasaderi Bibian Lucilla Jones uzahagararira Argentine nawe afata ifoto y’urwibutso na Perezida Kagame na Minisitiri Mushikiwabo.

Ikindi ngo Ubuyapani buzakira abanyeshuri b’Abanyarwanda bajya kwiga iby’ikoranabuhanga muri kaminuza zo muri kiriya gihugu.

Uhagarariye Argentine, Ambasaderi Bibian Lucilla Jones, yavuze ko igihugu cye kizafatanya n’u Rwanda mu bikorwa by’iterambere bitandukanye ndetse no mu by’ubucuruzi.

Igihugu cya Argentine n’u Rwanda birateganya, mu gihe kitarambiranye, gushyira umukono ku masezerano y’ubufatanye ku bijyanye n’ubuhinzi n’ubworozi, ikoranabuhanga, ubuzima, inganda n’ubucukuzi bw’amabuye y’agaciro ndetse n’ibijyanye n’imibereho myiza y’abaturage.

Munyantore Jean Claude