Uruganda rw’amakaro, East African Granite Industries, ruzaba rufite ubushobozi bwo gukoresha abakozi babarirwa muri 200 ndetse rugashobora no kunguka amafaranga arenga miliyoni 147 ku mwaka muri iki gihe rugitangira ibikorwa byarwo.

East African Granite Industries ni iya sosiyete yitwa Building Materials Investments Limited (BMI Ltd) iyoborwa na Rwanda Social Security Board (RSSB) na Crystal Ventures Limited; nk’uko tubikesha itangazo rya sohotse tariki 04/07/2012.

Uru ruganda ruzafasha cyane abantu bubaka kuko bazajya babona hafi ibikoresha bajyaga batumiza hanze kandi bibahenze. Kuba ruri muri Afurika y’Uburasirazuba bizatuma izindi nganda zikora nka rwo zigabanya ibiciro.

Amakuru aturuka mu karere avuga ko Perezida Kagame azanashyira ibuye ry’ifatizo ahazubakwa inyubako ya Caisse Social du Rwanda.

Umukuru w’igihugu kandi ngo azanasura ahazubakwa hoteli y’inyenyeri 4 ya sosiyete y’ishoramari mu karere ka Nyagatare izwi kw’izina rya EPIC. Sosiyete ya EPIC ifatwa nka sosiyete y’ishoramari y’abaturage ba Nyagatare kuko na bo baguzemo imigabane.

Hashize icyumweru kimwe gusa ikigo cy’igihugu gishinzwe imyubakire (Rwanda Housing Authority) gitangaje ko Umujyi wa Nyagatare ari wo ugiye kuba Umujyi w’Intara y’Uburasirazuba.

Mu rwego rwo kwitegura uwo mushyitsi w’imena uzagenderera akarere ka Nyagatare, hirya no hino mu mujyi wa Nyagatare haragaragara ibikorwa by’isuku bidasanzwe. Ibiti ku mihanda yo mu mujyi wa Nyagatare babikonze, inkengero z’imihanda barimo kuziharura no kuzikubura ndetse banakura ibihuru hafi.

Niyonzima Oswald