Rev.Dr. Antoine Rutayisire

Isengesho ryabaye kuri iki cyumweru tariki 28 Werurwe 2021 ryakozwe mu buryo budasanzwe, aho hifashishijwe ikoranabuhanga rinyuzwa ku bitangazamakuru n’imbuga nkoranyambaga zinyuranye, mu rwego rwo kwirinda ko abantu baterana ari benshi bikaba byatuma habaho ikwirakwira ry’icyorezo cya COVID-19.

Mu nyigisho yatanze yifashishije ingero zinyuranye zo muri Bibliya, Pasiteri Antoine Rutayisire yakebuye abayobozi batererana abo bayobora mu bihe bikomeye, aho yavuze ko abo ari abayobozi badafite icyo bafasha abo bayobora.

Ati “Umurimo w’umuyobozi iteka ryose, ni ukuzana impinduka mu bantu no mu bintu aho ari”.

Yagaragaje uburyo abenshi babona ubuyobozi nk’umurimo w’umunezero, abibutsa ko ubuyobozi buri gihe buba bufite ibibazo, ko atari ikintu cyo gukinisha ngo umuntu yicare adamarare.

Ati “Abantu benshi ntabwo bakunze gutekereza ubuyobozi nk’ahantu h’ibibazo, ahubwo bakunze kuhatekereza nk’ahantu h’ibisubizo, ariko reka mbabwire ubuyobozi bwose iteka ryose buba bufite ibibazo, nutagira ibibazo by’abakozi uzagira ibibazo by’ibikoresho, nutagira ibibazo by’ibikoresho uzagira ibibazo by’abashaka gutwara umwanya wawe, nutagira ikibazo cy’ibyo uzagira ikibazo cy’imihangayiko y’uko ugomba gukora akazi kandi ukagira impinduka”.

Arongera ati “Ubuyobozi ni umurimo iteka ryose ubamo ibibazo, kandi bisaba ko nk’umuyobozi uzana impinduka”.

Uwo Muvugabutumwa, yavuze ko igihe cyose uri umuyobozi, ibibazo byose ugomba kubyemera, intambwe ya mbere yo kugira ngo uyobore neza ukaba witeguye guhura n’ibibazo.

Yifashishije urugero rwo muri Bibiliya mu gitabo cyo Kuva mu gice cya 14, yagaragaje uburyo uwiteka yasabye Mose kubaka amahema yo kurwana ku baturage be bagabwagaho ibitero n’umwami Farawo, agaragaza ko ubwo baterwaga bose bahungiye kuri Mose, na we ntiyabatererana.

Mu gukebura bamwe mu bayobozi, Pasiteri Rutayisire yifashishije ingingo esheshatu zigaragaza imyitwarire y’umuyobozi nyawe agendeye ku butwari bwaranze Mose, aho izo ngingo zose zitangirwa n’inyuguti ya “C” mu rurimi rw’icyongereza.

Ingingo ya mbere ni ‘Compassion’ Ati “Ibi bivuze kubona abantu bawe ukabagirira impuhwe. Ndababwira nk’abantu baragiye inka, iyo mu ishyamba hazagamo intare wabonaga inka zose zigiye hamwe zikegera umushumba wazo, bivuze ko umuyobozi ahagarara hagati y’ikibazo n’abantu be, hari abayobozi bamwe ikibazo kiza aho guhagarara mu kibazo ngo bagire impuhwe z’abantu babo ahubwo bakongeramo ikibazo”.

Yagarutse ku muyobozi wigeze kumuyobora aba ikigwari ubwo bari bahuye n’ibibazo, ngo aho kuza kubahumuriza we yagiye iwe afata matola araryama akuraho na telefoni bamushatse baramubura.

Ati “Twaramushatse turamubura hanyuma nza kumubona ndamubaza nti ese bishoboka bite ko ikibazo cyaza tukakubura? Ati nabonye ikibazo kindenze ndambura matola yanjye ndaryama ndasinzira”.

Pasiteri Rutayisire yagaye abayobozi nk’abo babona ikibazo kivutse bagahunga. Ati“Hari abantu batekereza gutyo ikibazo cyavuka aho kubishakira umuti akajya gutembera, akishakira inzira zoroshye, Umuyobozi uhunga mu gihe cy’amage (cy’ibibazo), uwo ntabwo ari umuyobozi”.

Yifashishije urugero rwa kabiri rwa Mose yise ‘Communication’ aho umuyobozi asabwa kuvugana n’abantu, ababwira uko ibintu bigenda muri icyo kibazo anabaremamo icyizere nk’icyo Mose yaremye mu bakirisitu ubwo bari bagabweho ibitero.

Ageze ku ngingo ya gatatu yavuze ko umuyobozi agomba kugira icyitwa ‘Confidence’ bivuze kwigirira icyizere ati “Confidence ni uguha abaturage icyizere. Iyo utifitiye icyizere wowe cyubake mu bantu bawe, ubabwire uti ibibazo birahari biteye bitya ariko nimwihangane Imana igiye kuzana ibisubizo”.

Kuri urwo rugero rwa Mossi yifashishije, yagarutse no ku ngingo ya kane yise ‘Calmness’(Ugutuza) aho yasabye abayobozi gutuza mu gihe bahuye n’ibibazo, mu rwego rwo kubishakira umuti.

Ati “N’ubwo yaba atari n’umuntu usenga, umuntu wese yagombye kugira ugutuza muri we, kandi Imana yaravuze ngo mu Ituze n’Ibyiringiro, ni ho muzahererwa imbaraga”.

Ingingo ya Gatanu yatanze yifashishije urugero rwa Mose, ni ‘Collaboration’ aho ngo Imana yabwiye Mossi ngo bwira abantu bakomeze bagende.

Yavuze ko mu bibazo abantu badakwiye gukuka umutima ati “Nakunze ukuntu Imana yabwiye Mose ngo: “Ariko Mose ni iki gitumye untakira? Bwira abantu bakomeze bagende, iki cyitwa ‘Collaboration’, kubwira abantu bakagenda n’ubwo haba hari ibibazo ntibidukura muri gahunda zacu no mu ntego zacu, icyo bikora ni ukutugendesha buhoro gusa”.

Yatanze urugero kuri COVID-19 aho yemeje ko n’ubwo yateje ibibazo ikatugendesha buhoro, n’ubwo hari abapfuye ariko ntiyabujije abantu kugenda.

Yagize ati “Iki cyagombye kutwigisha ngo n’ubwo ibibazo bihari muhaguruke tugende, mwarabibonye Coronavirus twarayirwanyije, twambara udupfukamunwa, turakaraba, tugura imiti yo kwisiga, tujya muri Guma mu rugo, biriya ni byo bita kubwira abantu ngo nimugende ibibazo byose tuzabitsinda”.

Urugero rwa nyuma yatanze mu ngingo esheshatu zaranze Mose ni ‘Community’ aho abantu basabwa kwishyira hamwe mu bibazo.

Pasiteri Rutayisire yashoje ashima ubuyobozi bw’u Rwanda uburyo mu byo igihugu kimaze kugeraho bwagiye bubigiramo uruhare, ariko yibutsa ko inzira ikiri ndende aho basabwa gukomeza kurwanya ubukene, gukomeza kurwanya Covid-19 n’ibindi bibazo binyuranye bibangamiye abaturage, ariko kandi abasaba kurushaho no gusenga Imana.

Ati “Bagiriye Mose icyizere ariko bongeramo n’Imana. Buri gihe nsengera iki gihugu ngo gikomeze kugirirwa icyizere mu miyoborere ariko twibuke n’Imana kuko ni yo idukoresha, dukomeze dusengere igihugu cyacu, kandi dukomeze guhinduka. Muhaguruke dukomeze tugende”.

MENYA UMWANDITSI

Servilien Mutuyimana

Umunyamakuru

@ mutuyiserv

Reba inkuru zose nanditse ( 1867 )