Amakoperative abiri yakoraga ibikorwa birimo ubuhinzi, ubucuruzi ndetse n’amatsinda agamije iterambere yakoreraga ku butaka bw’itorero ry’Ababatisita mu kagari ka Karera mu murenge wa Rilima, ni yo yatungaga agatoki umuyobozi w’iri torero Ndagijimana Emmanuel kuba atarabahaye amafaranga y’ingurane y’imitungo yabo yari kuri ubwo butaka, ubwo bimurwaga bitewe n’uko hazubakwa ikibuga cy’indege mpuzamahanga cya Bugesera.

Nyuma y’uko rero Kigali Today itangarije iki kibazo, itsinda ryashyizweho n’ubuyobozi bw’Akarere ka Bugesera ryatangaje ko ryamaze kumvikanisha abaturage na Pasiteri; ko bitarenze tariki 20 Ugushyingo uyu mwaka azaba yabahaye aya mafaranga n’ibikoresho byose yari yatwaye amatsinda n’amakoperative yamuregaga nk’uko Gasana John wari uhagarariye iri tsinda unashinzwe iterambere ry’amakoperative n’abikorera muri aka karere abivuga.

Agira ati “ Ku ikubitiro yabanje guhakana ko nta deni na rimwe abereyemo amatsinda n’amakoperative ariko mu bucukumbuzi twakoze twasanze ababereyemo umwenda.

Twafashe umwanzuro ko umuyobozi w’umurenge wa Rilima agomba kujya muri Minisiteri y’ibikorwa remezo maze akareba agaciro bahaye imitungo y’ayo makoperative n’amatsinda”.

Gasana avuga ko nibamenya agaciro ka buri kintu abaturage bazahita bahabwa amafaranga y’imitungo yabo Pasiteri Ndagijimana yari yaribarujeho.

Ni icyemezo abanyamuryango b’aya makoperative n’amatsinda bishimiye nk’uko bivugwa na Bihoyiki Appolinaire perezida wa koperative Witinya imwe mu yatwariwe imitungo.

Ati “ Turashimira ubuyobozi bw’Akarere ka Bugesera n’itangazamakuru kuba bwaradufashije kuko pasiteri yari yaranze ko twumvikana. Ibi bitwereka ko ubuyobozi butwitayeho, ubundi dutegereje ko itariki igera tukabona ibyacu”.

Ibyo Pasiteri Ndagijimana agomba guha aba baturage ni amafaranga ari hagati ya Miliyoni 10 na 20 ; ndetse n’ibikoresho birimo iminzani ine nayo yatwaye yakoreshwaga na Koperative COCOMAI yacuruzaga imyaka aho umwe ufite agaciro karenga ibihumbi 400.

Egide KAYIRANGA