OMS yatangaje ko abagera ku bihumbi 30 muri Afurika banduye ubushita bw’inkende

Yanditswe na

Ruzindana Janvier

24-09-2024 - 20:46' | Ibitekerezo ( 1 )

Ishami ry’umuryango w’abibumbye ryita ku buzima (OMS), ritangaza ko kugeza ubu muri uyu mwaka wa 2024, abantu bagera ku bihumbi 30 muri Afurika, banduye indwara y’ubushita bw’inkende.

Kuva muri Mutarama kugeza tariki 15 Nzeri 2024, abagera ku bihumbi 30 muri Afurika banduye ubushita bw'inkende

Umubare munini muri Abenshi muri abo ni abakomoka muri Repuburika ya demokarasi ya Congo, aho OMS ku wa mbere yatangazaga ko n’ibipimo by’iyi ndwara byashize.

OMS ivuga kandi ko abantu barenga 800 bapfuye bazize iyi ndwara mu mpande zose z’uyu mugabane, kugeza ubu muri uyu mwaka.

Iri shami rya UN, rikomeza rivuga ko ibihugu birimo RDC. Santrafurika ndetse n’u Burundi byibasiwe n’iyi ndwara y’ubushita bw’inkende kandi irushaho kugenda yiyongera.

Mu itangazo ryayo, OMS ntiyatanze imibare igereranya imyaka yashize na 2024, ariko Africa CDC, igaragaza ko mu 2023, ibihugu birindwi byibasiwe n’iyi ndwara habonetse abarwayi barenga ibihumbi 14, n’abagera kuri 739 bapfuye, bingana n’ubwiyongere bwa 78.5% by’ubwandu bushya, mu 2022.

Ibiro ntaramakuru by’Abongereza, Reuters bitangaza ko kugeza ubu imibare yo kuva muri Mutarama 2024 kugeza tariki 15 Nzeri 2024, Abantu 29,342 barwaye iyi ndwara mu gihe 812 bahitanywe na yo mu mpande zose z’Afurika, nk’uko OMS ibitangaza.

Banki y’Isi yatangaje ku wa Gatandatu ko ishobora gutanga miliyoni zigera ku 130 z’amadolari, ku bihugu 10 by’Afurika, mu rwego rwo kubifasha kurwanya icyorezo cy’ubushita bw’inkende.