Umwe mu baturage bahatuye watangiye ikibazo mu nteko rusange yo ku wa 16 Ugushyingo 2021 witwa nkurikiyinka Jean Baptiste, avuga ko kuba ruhurura itubakiye bishobora gushyira ubuzima bwabo mu kaga.

Ati “Iyo imvura iguye akenshi tuba duhangayitse kuko tuba tubona ko ubuzima bwacu buri mu kaga, amazi akinjira mu nzu akadusenyera n’ibindi”.

Asaba Leta ko yabubakira ruhurura ku buryo guhangayika byavaho, bagatekereza ibindi byateza imbere imibereho yabo.

Umuyobozi w’ishami ry’imiyoborere myiza mu Karere ka Nyarugenge, Niyibizi Jean Claude wari muri iyo nteko rusange, yavuze ko bagiye kubakorera ubuvugizi kuri icyo kibazo kugirango kibe cyakemuka.

Ati “Abaturage baba bafite ibyifuzo byiza kandi byumvikana. Akenshi natwe nk’ubuyobozi twumva ko ibyifuzo byabo byakemuka. Mu by’ukuri kubaka ruhurura bisaba ubushobozi kandi, uburyo umuturage aba atanzemo ikifuzo ni inzira nyayo kuko biba bivuye ku mudugudu natwe tukabizamura kugeza ku rwego rw’Umujyi wa Kigali, noneho byamara gusuzumwa bigashyirirwaho ingengo y’imari ku buryo bisubizwa”.

Avuga ko ikibazo cya ruhurura ya Kamenge aribwo akimenye ariko bagiye kugisuzuma noneho kikazashyirwa mu ngengo y’imari y’umwaka utaha, kuko iy’uyu mwaka yarangiye noneho bazubakirwe ruhurura cyane ko ifasha no mu iterambere rusange ry’Akarere.

Niyibizi ashima Leta yashyizeho gahunda y’inteko rusange kuko ihuza ubuyobozi n’abaturage mu rwego rwo kubakemurira ibibazo ndetse bagire n’uruhare mu bimukorerwa.