Uyu mugabo w’imyaka 55 y’amavuko ahamya ko ihohoterwa rikorerwa abagabo ririho mu ngo gusa ngo abagabo bake, nawe arimo, nibo batinyuka kuritangaza kuko abenshi baba batinya ko babaseka.

Ibi yabitangaje tariki 18 Werurwe 2015 ubwo abaturage bo mu Kagari ka Mpanga atuyemo bakangurirwaga kurwanya ihohoterwa rikorerwa mu ngo n’umushinga ushinzwe guteza imbere agace ko mu Mayaga ya Busoro mu Karere ka Nyanza (APIDERBU).

Agira ati “Ihohoterwa ryampereyeho kuko umugore nari maranye nawe imyaka irenga 35 yantanye abana twabyaranye yigira gucudika n’undi mugabo, ndahinga bakaza bombi bagasarura yitwaje ko ibyo nagezeho byose twabishakanye”.

Avuga ko igihe umugore yamutaga mu nzu ya wenyine kubwe yabonaga ko bidashoboka ngo kuko kuva mu mwaka wa 1978 babanaga nk’umugabo n’umugore.

Abivuga atya “Twari tubanye imyaka irenga 35 dufite abuzukuru ariko ibyo byose yabirenzeho ansigira abana mu rugo, ariko mbabazwa n’uko ibyo mpinze mu murima we n’umugabo ubu babana baza kubinteraho ngo twafatanyije kubishaka”.

Turikunkiko atangaza ko igihe cyose yabanye n’uwo mugore we batigeze basezerana mu mategeko, ngo iyo basezerana ntaba yaramutanye abana ngo ajye kubana n’undi mugabo ku mugaragaro ntibigire inkurikizi zibaho mu rwego rw’amategeko.

Sibomana Emmanuel, umukozi wa APIDERBU ifatanya ibikorwa n’umuryango wa Action Aid mu Karere ka Nyanza avuga ko ihohoterwa iryo ariryo ryose rigira ingaruka mu muryango, akavuga ko ariyo mpamvu biyemeje kurirwanya.

Jean Pierre Twizeyeyezu