Gatabazi Cyriaque akimara gukubitwa ibuye tariki 25/10/2012 yahise ajyanwa mu bitaro bya Nyanza binaniranye yoherezwa mu bitaro bya Kaminuza y’u Rwanda biri i Butare mu karere ka Huye naho biza kunanirana yoherezwa mu bitaro bya CHUK mu mujyi wa Kigali ari naho yaguye.

Iyi nkuru y’incamugongo ikimara kugera aho nyakwigedera yari atuye mu karere ka Nyanza inshuti n’abavandimwe be bahise batangira kumuririra ndetse bihutira no kuza gufata mu mugongo abo mu muryango we.

Mu rugo rwa Gatabazi Cyriaque umubabaro n’ishavu nibyo byari ku maso y’abantu batabaye abo mu muryango we bariraga bagira bati: “Umuturanyi akaba n’umuvandimwe wacu apfuye azize amaherere kuko biragoye kwiyumvisha uburyo santimetero z’ubutaka umuntu azihora undi akamukuramo umwuka w’abazima”.

Mukakayumba Mariya ni umwe mu bagore baririraga Gatabazi Cyriaque bavuga ko batazongera kumubona ashakisha ibya mubeshaho we n’umuryango we.

Uyu mugore yagiraga ati: “kuva mu mwaka wa 1987 nshakira muri aka gace Gatabazi yari umuturanyi mwiza cyane agakunda abana kandi nabo bakamukunda none dore arigendeye azize imitima mibi y’abantu”.

Abayobozi mu nzego z’ubuyobozi z’aho uyu mugabo yari atuye zivuga ko Gatabazi Cyriaque abasigiye ikimenyetso kiranga ubupfura n’imico myiza batazibagirwa muri ako gace yari atuyemo.

Maniragaba Elysé, uyobora Akagali ka Nyanza Gatabazi Cyriaque yagize ati: “ Ku bwanjye n’abaturage nyoboye ntiduteze kuzibagirwa uburyo Gatabazi ari we waduhaye isambu twubakamo ibiro by’umudugudu wa Gishike yari atuyemo mu gihe abandi abaturage bari baranze kuyitanga”.

Niyomugabo Vincent akimara gukora icyaha yirukanse ibirometero bisanga bitanu ahunga aho icyaha akekwaho cyari cyabereye ariko yahise atabwa muri yombi ajyanwa kuri station ya polisi ya Busasamana mu karere ka Nyanza.

Nyakwigendera apfuye asize umugore umwe n’abana barindwi babyaranye.
Imana imuhe iruhuko ridashira!!!!

Jean Pierre Twizeyeyezu