Iki kibazo gihangayikishije ubuyobozi bw’umurenge wa Busasamana ari nawo ubarizwamo igice cy’umujyi w’akarere ka Nyanza ayo masosiyete atwara abagenzi afitemo ibiro bitandukanye.

Muganamfura Sylvestre, umunyamabanga Nshingwabikorwa w’umurenge wa Busasamana yageze ubwo yitabaza abari muri iyo nama y’umutekano kugira ngo bamubafashe gukemura icyo kibazo cy’amasosiyete atwara abagenzi avuga ko lifuti zayo zirimo guhindura abana bato ibirara cyane cyane abiga mu mashuli abanza.

Agaragaza uburemere bw’icyo kibazo yagize ati: “Ndasaba inama y’umutekano y’akarere kubuza amasososiyete atwara abagenzi kujya birinda guha abana cyane cyane abanyeshuli amalifuti kuko bibatera uburara no gukererwa ishuli. Byongeye bamwe bakanazimira”

Abana bato biga mu mashuli abanza basigaye biharaje ingeso mbi yo kuramukira ku mihanda bategereje lifuti zitangwa n’ayo masosiyete atwara abagenzi; nk’uko bivugwa n’umuyobozi w’umurenge wa Busasamana.

Rimwe na rimwe bategereza izo lifuti ariko bitewe n’uko nta gahunda baba bafitanye n’abashoferi babacaho batabatwaye akenshi ntibibwirize ngo bagende n’amaguru ahubwo bagahitamo gutegereza indi modoka iza iyukurikiye kuko ziba zinyuranyuranamo.

Abana benshi muri bo bibaviramo gukererwa ishuli abandi babona amasaha akuze batakigiye ku ishuli bagahitamo kutajya kwiga; nk’uko Muganamfura yakomeje abisobanura.

Abakobwa bamwe na bamwe bamaze kurarurwa n’izo lufuti zibazungurukana mu mujyi wa Nyanza kugeza ubwo bibashora mu busambanyi na bamwe mu bashoferi.

Amasosiyete atwara abagenzi mu mujyi wa Nyanza akunze gutanga amalifuti nk’ayo ku bantu bajya ahitwa ku Rwesero aho isoko rya Nyanza ryimukiye kimwe n’ahitwa ku bigega.

Murenzi Abdallah, umuyobozi w’akarere ka Nyanza wari uyoboye inama y’umutekano yaguye y’akarere akimara kwitabazwa kuri icyo kibazo yavuze ko kwima abana bato lifuti byonyine bidahagije ati icyaba cyiza kurutaho ni uguhagarika amalifuti atangwa n’ayo masosiyete.

Nyuma yo kugaragarizwa icyo kibazo, ubuyobozi bw’akarere ka Nyanza ngo bugiye kuvugana n’abahagarariye ayo masosiyete atwara abagenzi kugira bubafashe guca ayo malifuti amazi atarerenga inkombe.

Bamwe mu baturage bavuga ko izo lifuti zari zibafatiye runini mu ngendo nto bakorera mu mujyi wa Nyanza. Umwe yagize ati: “Ziriya modoka ziradufasha kandi nazo zibyungukiramo kuko ziduha lifuti natwe twakenera kujya mu mujyi wa Kigali, Huye n’ahandi hanyuma sosiyete yayitanze tukayibitura tuyiteza imbere”.

Igituma izi lifuti zimaze kumenyekana cyane mu mujyi wa Nyanza biterwa no gutanguranwa abangenzi kw’ayo masosiyete hanyuma buri sosiyete igakoresha uburyo bwo kureshya abagenzi ibaha lifuti mu ngendo nto zikorerwa mu makaritsiye (quartiers) y’umujyi.

Ubuyobozi bwa Horizon Express ihagarariwe mu mujyi wa Nyanza buvuga ko n’ubwo yari imaze kugira abakiriya benshi binyuze muri ubwo buryo bwo kubaha lifuti ku rundi ruhande harimo n’ibibazo. Umwe mu bakozi ba Horizon abivuga atya: “Gutanga lifuti hari aho biduteranya n’abantu kuko hari abo uyima kubera ko imodoka yuzuye ugasanga amakimbirane aravutse”.

Byongeye kuba abashoferi b’izo sosiyete zitwara abagenzi abenshi muri bo bavuka mu mujyi wa Nyanza nabyo biri mu bituma bagenda batwara abo bahuye nabo bose kubera ikimenyane kuko bamwe muri bo mubazisaba baba ari inshuti, abavandimwe cyangwa ababyeyi babo.

Izindi ngaruka zikomoka kuri ayo malifuti ni uko zongera umubare munini w’imburamukoro mu mujyi wa Nyanza. Umwe mu bashoferi ba Horizon Express ugenda witegereza ububi bw’izo lifiti batanga abivuga atya: “Njye hari igihe mbona umuntu w’umusore yiriwe akora indendo z’urujya n’uruza bukamwiriraho agacyurwa n’umugoroba wa joro kandi ari bukenere kurya ntacyo yinjije usibye umunyanga atahira”.

Amasosiyete atwara abagenzi mu mujyi wa Nyanza arimo Volcano Express, Horizon Express na KBS ( Kigali Bus Services) yose akaba atanga lifuti mu rwego rwo kureshya abakiriya mu rwego rwo guhangana ku isoko ry’akazi nk’uko babitangaza.

Jean Pierre Twizeyeyezu