Hari mu gicuku ubwo abaturanyi bumvaga urusaku n’induru, ubwo Fabien Hategekimana n’umugore we Vestine Dushimiyimana barwanaga inkundura, nk’uko bitangazwa na bamwe mu baturanyi batabaye rugikubita.

Aba baturanyi babana mu gipangu kimwe, bavuga ko bijya gutangira bumvishe bombi baterana amagambo mu buryo bworoshye batakekaga ko biza kuvamo imirwano yeruye, ikanahungabanya umutekano w’abandi nabo ubwabo batiretse.

Théophile Nkurunziza, umwe mu bagize uruhare mu guhosha iyo mirwano, yavuze ko ko ubwo yari atashye mu gicuku, yumvishe intonganya zaje gusozwa n’imirwano yashyamiranyije aba babana bari bamaze amezi agera kuri atanu gusa barushinze.

Yagize ati: “Imirwano yabaye hagati yabo bikingiranye mu nzu ariko batangiye kurwanisha ibikoresho byo mu gikoni birimo umudaho n’umwuko biramenyekana, nibwo nahise ntabara nica urugi tubasangamo, turabatandukanya kuko bari bahambiranye nk’ipata n’urugi kandi bakubitana ibikoresho bishobora gukomeretsa”.

Mu gihe iyo mirwano yari irimbanije, umwana bafite w’amezi 10 bari bamujugunye mu nguni y’inzu, nk’uko Christine Mukamwiza umuturanyi wabo wihutiye gukiza mbere ya byose ubuzima bw’urwo ruhinja yakomeje abitangaza.

Nyuma yo gukiza Dushimiyimana wakubitwaga ariko anirwanaho, abaturanyi bahise bakingirana umugabo we mu nzu kugira ngo inzego z’umutekano zari zatabajwe zitaza zisanga yatorotse.

Aho inzego z’umutekano zihagereye Hategekimana yavanwe muri iyo nzu, kugira ngo we n’umugore we bazisobanurire icyabateye guhungabanya umutekano w’abaturage mu ijoro babuza abandi amahwemo.

Yisobanura, Dushimiyimana yavuze ko yari amaze igihe agaburira umugabo akanga kurya, kuri iyi nshuro yamwingingingira kurya inyama yari yatetse agahitamo kumukubita.

Ariko yongeyeho ko intandaro ya byose ari uwo mwana afite yabayraranye n’undi mugabo babanaga, ati: “Ikibitera ni umwana mpetse nabyaranye n’undi mugabo twabanje kubana ariko nyuma tukaza gutandukana kandi ariwe ubigizemo uruhare”.

Yavuze ko igihe cyose uwo mugabo babyaranye ahamagaye kuri telefoni ashaka kumenya amakuru y’uko uwo mwana amerewe, umugabo bimubabaza cyane agahita ashakira igisubizo mu mirwano akanivumbura yanga kurya ibiryo byose yatekewe.

Nyuma y’iyo mirwano yasoje Hategekimana akomeretse ku munwa, yahise atabwa muri yombi ajyanwa gucumbikirwa kuri station ya Polisi ya Busasamana.

Hategekimana yashakanye na Dushimiyimana amwambuye undi mugabo, witwa Mazimpaka Alexis ari nawe bafitanye umwana ukiri uruhinja.

Inzego z’umutekano zarimo Polisi y’igihugu, ingabo n’inkeragutabara basabye abaturage baho iyo mirwano yabereye kubana neza, bakirinda amakimbirane yo mu miryango baharanira icyabateza imbere kuruta kuba mu mwiryane.

Jean Pierre Twizeyeyezu