Mu karere ka Nyanza uyu munsi w’umuganura waranzwe no kwishimira umusaruro w’ibyo bejeje muri uyu mwaka wa 2012 birimo ibihingwa ngandurarugo nk’ibishyimbo, imyumbati n’ibindi bihingwa byera muri ako karere bigafasha abaturage kwihaza mu biribwa.

Muganamfura Sylvestre, umuyobozi w’umurenge wa Busasamana wizihirijwemo uyo munsi yabwiye imbaga y’abaturage bari bitabiriye ko batagomba gucika mu muco w’Abanyarwanda cyane cyane ko werekanaga umukiro ndetse bakanawishimira.

Muri uwo muhango baboneyeho gusangirira hamwe bimwe mu biribwa bahinze hirya no hino mu mirima yabo birimo ibigori ndetse banabisomeza amarwa.
Abaririmba imbyino zo hambere benshi bita “Karahanyuze” nabo ntibatanzwe muri uwo munsi mukuru w’umuganura babifashijwemo n’itorero ryitwa “Ambiance” rizwiho mu karere ka Nyanza kubyina indirimbo z’abahanzi bo mu Rwanda rwo hambere.

Mu buhamwa bwa bamwe mu baturage batanze bagaragaje ko muri rusange bahinga bakeza kandi bakaba bashobora kwihaza mu biribwa bagasagurira n’amasoko.

Ntukarambirwe Bosco yavuze ko mu ihinga ry’umwaka wa 2012 yashoboye kweza toni 3 z’ibishyimbo ku buso bungana na hegitari imwe. Yagiriye inama abahinzi bagenzi be gukora ubuhinzi bwa kijyambere bujyanye n’igihe cy’iterambere u Rwanda rugezemo ndetse n’isi muri rusange.

Nk’uko uyu muhinzi w’intagarugero wo mu murenge wa Busasamana yakomeje abisobanura ngo iki nicyo gihe umuhinzi wo mu Rwanda agomba gukoreramo ubuhinzi bwe bw’umwuga agahingira igihe kandi akifashisha n’inyongeramusaruro kugira ngo umusaruro uturuka mu buhinzi urusheho kwiyongera.

Umuyobozi w’akarere ka Nyanza, Murenzi Abdallah, yashimiye ubuyobozi bw’umurenge wa Busasamana bwagize igitekerezo cyo kwizihiza uwo munsi ndetse n’abaturage bakishimira imirimo yavuye mu maboko yabo basangirira hamwe ibyo bahinze.

Murenzi Abdallah yagaragaje ko uwo munsi wihirijwe mu murenge wa Busasamana kubera ko ari umurenge w’umujyi byongeye niwo marembo y’akarere ukaba n’umujyi w’ubukerarugendo kuko niwo gicumbi gicumbikiye umuco Nyarwanda.

Yasabye abaturage bari muri uwo munsi mukuru kugira isuku ahantu bose kugira ngo abantu bose baza basura ibyiza bitatse ako karere bagende bakishimiye.

Umuyobozi w’akarere ka Nyanza yagarutse ku kibazo cy’umutekano avuga ko ibyagezweho byose ari wo bishingiyeho bityo abasaba abari aho kuwubungabunga ngo kuko nta kiguzi cyaho usibye kuwuharanira.

Nk’uko byavuzwe n’uyu muyobozi w’akarere ka Nyanza umutekano ni ikirezi cyambawe n’igihugu cy’u Rwanda kuko kinawusangizaho n’abandi batawufite. Ati: “Icyerekana ko u Rwanda ari igihugu gitekanye n’uko abana bacyo bari hirya no hino ku isi mu bikorwa byo kuhabungabunga umutekano”.

Uyu munsi mukuru w’umuganura mu karere ka Nyanza waranzwe n’ibintu byinshi bishimishije birimo imbyino za kijyarwanda ndetse no gucinya umudiho hagati y’abayobozi n’abayoborwa bishimira ibyo bagezeho babikesha umutekano bafite.

Jean Pierre Twizeyeyezu