Uwo murambo wa Bigaruka wari ufite imyaka 76, watoraguwe mu mu mudugudu wa Rutiritiri, mu kagari ka Mutongo ko mu murenge wa Cyato mu karere ka Nyamasheke, ubundi wari usanzwe uvuka mu mudugudu wa Gahira mu kagali ka Banda mu murenge wa Rangiro.

Théoneste Semakombe w’imyaka 30 afatanyije na Victor Nkomeje w’imyaka 33, nibo bamwishe, bamukubise ahagana mu masaha y’Isaa Yine basanze ari gucuragura ku rugo rw’uwitwa Simeon Ntawiyahura.

Semakombe yahise aburirwa irengero naho Nkomeje yemeye icyaha ahita ashyikirizwa Sitasiyo ya Polisi ya Kanjongo mu gihe hagikorwa iperereza. Umurambo wa nyakwigendera wabonetse mu nzira hafi y’urugo rwa Ntawiyahura wajyanywe ku bitaro bya kibogora ngo ukorerwe isuzuma.

Umuyobozi wa polisi ikorera mu karere ka Nyamasheke, Superintendent Ntidendereza Alfred, yasabye abaturage kwirinda kwihanira mu gihe bakorewe ibyaha kuko hari inzego zitandukanye, zishinzwe kubakemurira amakimbirirane no guhana abanyamakosa.

Ati: “Ubutabera burahari nibwo bugomba guhana umuntu nyuma yo guhamwa n’icyaha. Nta muturage n’umwe wemerewe kwihanira kuko uzabikora azajya abihanirwa, nk’uko n’uwo yafashwe n’undi agishakishwa. Polisi nicyo ibereyeho, ubuyobozi n’icyo bubereyeho”.

Yakomeje avuga ko niba hari uwakoze icyaha ikirego cyazajya gishyikirizwa polisi ikabikurikirana kuko ariyo ishinzwe umutekano w’abaturage n’ibyabo.

Mu gihe twakoraga iyi nkuru twagerageje kuvugana n’umunyamabanga nshingwabikorwa w’umurenge wa cyato wabereyemo iki cyaha, Nkinzingabo Patrice, ariko ntiyitabaga terefoni igendanwa.

Emmanuel Nshimiyimana