Biteganyijwe ko ibyemezo by’inama njyanama byohererezwa Guverineri akabanza akabishishozaho akareba niba koko byafatanywe ubushishozi, haba hari ibitanoze akaba yabagira inama.

Kuri uyu wa 19/01/2015 Guverineri w’Intara y’Uburengerazuba, Cartas Mukandasira yatangaje ko ku bwegure bwa Musabyimana wari perezida w’inama njyanama y’akarere ka Nyamasheke ntacyo yarenzaho.

Musabyimana Innocent yeguye ku mwanya wa perezida w’inama njyanama y’akarere ka Nyamasheke tariki 28/12/2014, akaba yaravugaga ko akazi akora muri iyi minsi katamwemerera kugumya kuba umujyanama w’akarere uko bikwiye.

Musabyimana ubu usigaye ari umunyamabanga uhoraho muri minisiteri y’ubuhinzi n’ubworozi mbere yari umuyobozi w’ikigo cy’igihugu gishinzwe guteza imbere ubuhinzi n’ubworozi (RAB).

Kuri ubu akarere ka Nyamasheke gafite inama njyanama ituzuye, nyuma y’uko uwari umujyanama akaba n’umuyobozi w’akarere Habyarimana Jean Baptiste yeguye ndetse na perezida w’inama njyanama akaba yaramaze kwegura.

Habyarimana Jean Baptiste yakomokaga mu murenge wa Ruharambuga mu gihe Musabyimana Innocent yavaga mu murenge wa Kagano.

Ndashimye Leonce visi perezida wa njyanama ya Nyamasheke avuga hazabaho kuzuza imyanya y’abajyana mu gihe minisiteri y’ubutegetsi bw’igihugu na komisiyo y’amatora bazaba bamaze kugena igihe bizakorerwa.

Agira ati “twebwe dutanga raporo muri minisiteri y’ubutegetsi bw’igihugu ikazagena umunsi, komisiyo y’amatora ikazaza gutoresha abajyanama”.

Ibi bishatse kuvuga ko umuyobozi w’akarere azaboneka nyuma yo kuzuza inama njyanama ku myanya iburamo. Kugeza ubu nta munsi cyangwa igihe biratangazwa ku buryo bizakorwamo.

Umugwaneza Jean Claude