Ibi byatangajwe kuri uyu wa 17 Ukuboza 2012, ubwo Itorero ryo ku rugerero ryasozwaga ku mugaragaro mu rwego rw’akarere ka Nyamasheke. Iki gikorwa cyabereye kuri site y’Ishuri rya Institut John Wesley -Kibogora riri mu murenge wa Kanjongo.

Abasore n’inkumi 483 ni bo batorezwaga kuri Site y’Ishuri “Institut John Wesley” rizwi ku izina rya I.J.W-Kibogora ryubatse ahitwa mu Ityazo mu kagari ka Kibogora mu murenge wa Kanjongo.

Mu minsi igera kuri 17 bamaze mu Itorero, aba basore n’inkumi bagaragaza ko hari byinshi batoreyemo byiganjemo indangagaciro z’Umuco Nyarwanda ndetse no gusobanukirwa amateka nyakuri y’Itorero ry’Igihugu.

Ibi byagaragariye mu mikino itandukanye ishinze imizi mu muco gakondo w’u Rwanda izi Ntore zagaragarije abitabiriye ibirori byo gusoza iri torero ku mugaragaro.

Abafashe ijambo bose muri ibi birori bashimiye Intore zo ku rugerero uko zitwaye n’icyizere zitanga mu kubaka u Rwanda kandi bakazikangurira kuzarangwa n’ibikorwa ubwo zizaba zigeze ku rugerero.

Indongozi nkuru mu karere ka Nyamasheke, ari na we muyobozi w’aka karere, Habyarimana Jean Baptiste yashimiye izi Ntore zo ku rugerero imyitwarire zagaragaje mu Itorero zari zimazemo iminsi kandi bikaba bigaragarira ku bipimo by’amanota zabonye mu bikorwa bitandukanye zakoze muri iki cyiciro.

Ibyo bikorwa birimo morale, ubwitange mu bikorwa, … ndetse n’imihigo y’Intore, aho Intore zo muri buri murenge zagaragazaga ibyo zizakora ubwo zizagera ku rugerero.

Indongozi nkuru y’i Nyamasheke, Habyarimana Jean Baptiste yasabye izi Ntore kuzafatanya n’izindi Ntore zisanzweho kandi azituma guharanira impinduka nziza hirya no hino mu midugudu.

Umuyobozi w’aka karere, Habyarimana Jean Baptiste asaba izi ntore zigiye ku rugerero gusigasira isura nziza iranga Indongozi za Nyamasheke kandi ibikorwa byabo bikagana imbere.

Emmanuel Ntivuguruzwa