Nzasabayesu Enock uhagarariye IBUKA mu murenge wa Kanjongo yabisabye mu muhango wo gusoza icyumweru cyo kwibuka ku rwego rw’akagari cyabaye tariki 19/04/2012.

Nzasabayesu yagize ati “hakenewe ubufasha ndetse n’ubuvugizi ngo Mukeshimana avurwe bityo mu gihe tuzaba twibuka ku nshuro ya 19 Jenoside yakorewe Abatutsi azabe nawe ari muzima nk’abandi”.

Mukeshimana yagerageje kuvurwa ariko birananirana ndetse banamushakiye umugore wo kumuba hafi ngo barebe ko hari umusaruro byatanga ariko byabaye iby’ubusa; nk’uko Nzasabayesu yabisobanuye.

Uhagarariye IBUKA mu murenge wa Kanjongo arasaba ko hashakwa ubufasha bwihariye mu kuvuza Mukeshimana kuko nawe afite uburwayi yihariye butameze nk’ubw’abandi.

Umuyobozi w’akarere wungiririje ushinzwe imari, ubukungu n’amajyambere yavuze ko ibi ari ibintu bibabaje buri wese ufite ubushobozi akaba akwiriye kureba icyo yakora. Yongeyeho ko nk’akarere, bagiye kubiganiraho bakareba niba hari ubushobozi bwaboneka nako kakagira icyo gakora mu kuvuza Mukeshimana.

Mukeshimana Aphrodis agenda azerera muri santere y’ubucuruzi ya Tyazo yivugisha nk’abandi barwayi bo mu mutwe, ubundi akagenda mu ngo zituriye aho asabiriza.

Abantu ku giti cyabo ndetse n’imiryago itandukanye, yaba irengera abacitse ku icumu ndetse n’indi, barasabwa gutabara bakagira uruhare mu kuvuza Mukeshimana.

Emmanuel Nshimiyimana