Ibi byagaragaye mu buhamya bw’aba baturage, ubwo kuri iki Cyumweru, tariki 06/01/2013, basurwaga n’abanyamuryango ba FPR Inkotanyi ku rwego rw’akarere ka Nyamasheke ngo barebe uko babayeho nyuma yo kuremerwa muri iyo gahunda.

Mu kagari ka Mubumbano mu murenge wa Kagano hafashijwe abaturage bane: babiri bagabiwe inka, abandi babiri bahabwa matelas zo kuryamaho.

Nyirandorimana Francoise ni umugore wari warasigajwe inyuma n’amateka. Nyuma yo kubakirwa inzu na we agashyiraho uruhare rwe rwo kuyitunganya, yahawe matela yo kuryamaho.

Atangaza ko iyi matela yamufashije kuryama heza kandi bikaba binamufasha gusigasira isuku. Nubwo agifite ikibazo cy’amikoro make, atangaza ko abantu bamugeretse amafaranga ngo bayigure ariko akabahakanira kuko na we akeneye kurara heza.

Nyiranzeyimana Esperance wari mu ntumwa z’umuryango wa FPR ku rwego rw’akarere ka Nyamasheke zagiye gusura aba baturage yatangaje ko urwo ruzinduko rwari rugamije kureba imibereho y’abo baturage nyuma yo guhabwa ubwo bufasha ariko kandi banabashishikariza gukomeza intambwe igana imbere kugira ngo biteze imbere bikwiye.

Nk’uko bigaragazwa n’abaremewe mu gihe hizihizwaga isabukuru y’imyaka 25 irangiye Umuryango wa FPR-Inkotanyi uvutse, ngo imibereho yabo igenda irushaho kuba myiza kandi bakagaragaza ko bafite icyizere cy’iterambere rirambye.

Emmanuel Ntivuguruzwa