Bizimana Jean Baptiste aba mu kanama nkemurampaka ka RALGA avuga ko imaze kuba ishyirahamwe rikomeye rifite ibikorwa bigaragara ariko ko bikeneye kunozwa ndetse abanyamuryango bakagomba kurushaho gutanga ibitekerezo by’uko iri shyirahamwe ryabo ryarushaho gutera imbere no kugumya kubahagararira neza.

Bizimana yabwiye abanyamuryango ko iri shyirahamwe ryamaze gutegura ikigo kizajya giha amahugurwa abanyamuryango babo ndetse bakaba bagiye gushinga ikigo cy’ubujyanama (centre de consultance) kizinjiza amafaranga azatuma ishyirahamwe ryibeshaho ariko ko abanyamuryango aribo bagomba gutanga umurongo nyawo w’ibyo bifuza.

Yagize ati “nicyo cyatuzinduye ngo duhe amahirwe abanyamuryango bacu uburyo bwo gutegura ibikorwa by’ejo hazaza mu ishyirahamwe ryabo niyo mpamvu hagiye kujyaho ikigo gihugura abakozi bari mu kazi kabo kugirango barusheho gusobanukirwa akazi bakora, turashaka ko ibikorwa by’imyaka itanu bene ishyirahamwe bagira uruhare mu kubigena”.

Bizimana avuga ko bari guharanira kwigira mu byerekeye amafaranga bakaba ari nabyo bari gukangurira abanyamauryango babo nabo ngo bimakaze uwo muco wo kubaho badateze amaramuko ku bandi abo aribo bose.

Iyi gahunda igamije kurushaho kumenyekanisha no kwegereza abanyamuryango ishyirahamwe ryabo izagenda igera no mu tundi turere tw’igihugu.

Umugwaneza Jean Claude