Umuyobozi w’akarere wungirije ushinzwe ubukungu n’iterambere, Bahizi Charles, yavuze ko abafatanyabikorwa b’akarere bakwiye kuba aba mbere mu guha abaturage ijambo bakagira uruhare mu byo baba bateguye, bityo bakabona amaboko atuma ibyo biyemeza kuzakora babikora neza kandi bikihuta kujya mu bikorwa.

Yabibabwiye agira ati “muri iyi nama dukwiye gufata ingamba z’ibyo tuzabasha gukora neza ariko kandi tugafata n’imyanzuro ko dukwiye guhiga ibyo dushoboye guhigura, tugakora ibyo dufitiye ubushobozi kuko kwizera ko abandi bazabidukorera ntibabidukorere byica intego yacu tuba twiyemeje, ibi bizatuma gahunda yo kwigira ijya mu bikorwa kandi twishimire kubaho twibeshejeho”.

Bahizi yasabye abafatanyabikorwa kugira uruhare rufatika mu gusobanurira abaturage ibyo bakora kugira ngo bajye babivuga nta bwoba ndetse bakabivuga nk’ishema ryabo, aha akaba yavuze ko kuba akarere karabonye amanota make, abaturage bavuga ko batagishwa inama mu bibakorerwa byaturutse ku kuba abafatanyabikorwa bataragize uruhare rukomeye mu kwibutsa abaturage no kubamenyesha ibyo bagezeho bityo bagatanga amakuru anyuranye n’ukuri kwabo ku bihari.

Uhagarariye abikorera yavuze ko imbaraga zabo arizo zizubaka akarere, bityo abasaba ko ibikorwa byabo bikwiye kuba mu nyungu zabo ariko kandi bikaba no mu nyungu z’abo baha serivise.

Yagize ati “niba dukora tudatekereza iruhande rwacu ntaho twaba tujya kuko abo baturage nitwe tubana nabo umunsi ku munsi, ariko kandi dukwiye gutinyuka tugasharika ubwoba tugatangira tukiteza imbere”.

Uhagarariye abikorera yongeye kwibutsa abafatanyabikorwa ko hakiri ibibanza mu isoko no mu gakiriro ka Rwesero ko bakwiye kuza gukoreramo ko nta kindi bisaba uretse gutinyuka bagafata iya mbere bakiteza imbere bakanateza imbere imiryango yabo n’akarere muri rusange.

Iyi nama y’abayobozi b’akarere n’abafatanyabikorwa b’ako ni inama iba buri mezi 6 mu rwego rwo kurebera hamwe uko ibikorwa bahuriyeho by’akarere bigenda bitera imbere.

Umugwaneza Jean Claude