Kuri uyu wa 20 Kanama 2015, muri gahunda igamije kugenzura uko ingengo y’imari igenewe ibikorwa byo guteza imbere uburinganire yakoreshejwe, akarere ka Nyamagabe kashimiwe ko kabashije kuyikoresha neza, abaturage b’ibitsina byombi bakabasha kwiteza imbere.

Umugenzuzi mukuru w’ungirije w’urwego rw’igihugu rugenzura iyubahirizwa ry’uburinganire, Eugenie Kabageni yatangaje ko bashimye ko akarere kahuje inzego zitandukanye mu kubahiriza ihame ry’uburinganire bigatuma kanaza imbere y’utundi turere.

Yagize ati “Haricyo twashimye kijyanye n’uko bashyizeho ingamba mu gutegura ingengo y’imari isubiza ibibazo by’abaturage, bashyizeho komite ihuza inzego zitandukanye, ndetse harimo na sosiyete sivire, bivuga ngo hari ubufatanye muri aka karere.”

Ibanga ngo akarere kakoresheje nk’uko umuyobozi w’akarere yabitangaje, ngo n’ubufatanye buha urubuga umuturage nawe akabasha gusobanukirwa n’ihame ry’uburinganire n’ubwuzuzanye.

Ati “Uyu musaruro uva mu bufatanye duhereye ku muturage, ibyo twategura byose tukareba uko ihame ry’uburinganire ry’ubahirizwa, atagize mo uruhare cya gihe cyo mu ntangiriro, ntabwo twaba twubakiye ahakomeye.”

Josiane Uwineza, yiga kudoda akaba yatangaje ko kera umwana w’umukobwa atahabwaga uburenganzira ariko ko ubu nawe ahabwa urubuga rwo kuba yakwiza imbere.

Ati “Nkurikije ukuntu abana bagiye babura uburenganzira ababyeyi bakumvako icya mbere ari umugabo, babona n’imirimo yo murugo ayibafashije bagahita bamushyingira, ariko ubu nta muntu bagishyingira ku gahato, nawe arakora.”

Uru ruzinduko rukaba rwari rwitabiriwe n’abahagarariye ambasade ya Suwede, itera inkunga ibikorwa bigamije guteza imbere ihame ry’uburinganire biciye mu ishami ry’umuryango w’ababibumbye rishinzwe guteza imbere umugore.

Caissy Christine Nakure