Isantere y’ubucuruzi ya Gasarenda iherereye mu murenge wa Tare, akarere ka Nyamagabe, imaze imyaka igera kuri 57, ikaba ihuza abaturage bavuye mu mirenge ihana imbibi n’umurenge wa Tare ndetse n’abo mu tundi turere nka Huye, Nyanza na Muhanga.

Kubera ubwinshi bw’abagana sentere y’ubucuruzi ya Gasarenda, abacuruzi biyubakiye dodane zigera ku 8 uvuye kuri kaburimbo kugeza ahari ikigo nderabuzima cya Mbuga, kugirango bagabanye ivumbi imodoka zateraga ibicuruzwa byabo nabo ubwabo ndetse n’impanuka.

Abaturage bacururiza muri iri iyi sentere ya Gasarenda baravugako kuva aho bashyiriyeho dodane ibicuruzwa byabo byagize umutekano kandi bakumiriye impanuka zaterwa n’umuvuduko.

Uwitwa Anastase Kayiranga yagize ati “Aho twashyiriyemo dodane ibicuruzwa bifite umutekano, nanone nta mpanuka zikiba mu muhanda kubera umuvuduko waragabanutse w’ibinyabiziga.”

Ariko n’ubwo dodane zakemuye ikibazo cy’ivumbi zikanagabanya impanuka hari bamwe mu batwara imodoka bibangamiye bitewe n’uko nta byapa bihari.

Uwitwa Higiro utwara imodoka yagize ati “Uretse abenyereye inaha ngaha bahaturiye bazi aho ziri, usanga iyo umuntu avuye ahandi ahagera imodoka igasimbuka bitewe n’uko yabonye nta kintu cyanditseho cyangwa ikigaragaza ko hari dodane.”

Ubuyobozi bw’umurenge wa Tare sentere ya Gasarenda iherereyemo bufite gahunda yo gushyira ibimenyetso biranga izo dodane kugira ngo hirindwe icyatera impanuka.

Bwana Richard Gasana, umunyamabanga nshingwabikorwa w’umurenge wa Tare yagize ati “Tugiye gukorana na polisi wenda ntitwabona icyapa kijya kuri buri dodani ariko nibura ku ntangiriro no kumpera y’umuhanda tukahashyira icyapa kigaragaza umuvuduko ntarengwa.”

Mu gukemura ikibazo cy’ivumbi n’impanuka ku buryo burambye, umuhanda uca mu i sentere y’ubucuruzi ya Gasarenda uzubakwa nkuko biteganyijwe mu ngengo y’imari y’imihigo y’umwaka 2015-2016.

Caissy Christine Nakure