Ubwo Perezida Kagame yabasuraga tariki 19/02/2013, Menyayabo Pahulini, umwe muri abo baturage bari bamaranye imyaka isaga 30 ubutaka bw’intizo yamugejejeho ikibazo cyo kuba hari ibyo badashobora kubukoresha kuko batabufiteho uburenganzira busesuye, akaba yemeza ko yari afite icyizere ko akibakemurira.

Ati: “Nabwiye Nyakubahwa Perezida kuko twari tubangamiwe kubera ko ubutaka twari dufite butari butwanditseho, twabonaga nta burenganzira, tumubaza ikibazo kuko twari twizeye ko agikemura nk’uko n’ahandi hose abikemura.”

Mutirende Janvière, umwe mu bashyikirijwe ibyangombwa by’ubutaka yavuze ko mbere batari bafite uburenganzira bwo kubutangaho ingwate muri banki ngo babe bahabwa inguzanyo, cyangwa se ngo babe bagurishaho gato ngo bakemure akabazo, ariko ngo ubu kiracyemutse bakaba bashimira umukuru w’igihugu.

Guverineri w’intara y’amajyepfo, Munyantwari Alphonse ,washyikirije aba baturage ibyo byangombwa by’ubutaka yabasabye kuzashimira Nyakubahwa Perezida wa Repubulika babubyaza umusaruro mu buryo bukwiye, ndetse bakaburinda isuri.

Ati: “Icyo nabasaba muri aka kanya ni uko mu rwego rwo gushimira koko Nyakubahwa Perezida wa Repubulika kandi natwe twikorera, ayo masambu icya mbere ni ukuyabyaza umusaruro uko bikwiye. Hari uguhuza ubutaka, gukora amaterasi y’indinganire, kurwanya isuri, icya gatatu ni ugukoresha inyongeramusaruro”.

Aba baturage bavuga ko bazagororera Perezida wa Repubulika mu kubaka igihugu bahinga ibihingwa byatoranijwe ndetse bahuje ubutaka.

Emmanuel Nshimiyimana