Mu gihe ubuyobozi bw’inzego z’ibanze buvuga ko Niyigira afungiwe kwanga gusaranganya ubutaka n’abandi baturage, abo mu muryango we bashinja inzego z’ubuyoboyobozi gushaka kumuhuguza ubutaka bwe dore ko banavuga ko banabifitiye ibyangombwa.

Niyigira Fred ni umwe mu mpunzi ziherutse gutaha zirukanywe mu gihugu cya Tanzaniya akaba yaratahukanye inka nyishi dore ko bavuga ko zageraga muri 400.

Umugore wa Niyigira avuga ko bamaze kugera mu Rwanda ubuyobozi bw’akarere ka Nyagatare bukabona umubare w’inka afite bamusabye kugurishamo zimwe akagura ubutaka bwo kuzororeramo. Ibi ngo ni ko yaje kubigenza maze agura ubutaka bugera kuri hegitari 26 n’uwitwa Mperimandwa zisanga aho yari yarahawe ku buryo yahise agira ahagera muri hegitari 36.

Nyuma ngo ubuyobozi bwaje kuza bushaka gukatiraho hegitari 12 abaturage babiri barimo uwitwa Kayitare usanzwe ari Umunyamabanga Nshingwabikorwa w’Akagari ka Nyarupfubire ndetse ngo baza guhaho n’uwitwa Musoni akaba umuyobozi w’urubyiruko mu Karere.

Madamu Izagire Winnie agira ati “ Umugabo wanjye yagiye kumva yumva ngo inka bazirukanye aho zabaga bazanamo izindi aje na we arazirukana asaba ko niba bashaka kuzimura babanza bakamwereka aho azimurira. Aho kumwereka aho azimurira bahise bamutwara kumufunga”.

Uyu mugore akomeza avuga ko ngo bashakaga kubambura iyo sambu bavuga ko nta byangombwa by’ubutaka bahafitiye kandi mu ibarura ry’ubutaka riherutse barahabaruje bakaba bahafitiye n’icyangombwa cy’ubutaka cy’agateganyo.
Mu gihe ariko bavuga ko bahafatiye icyangombwa, amakuru dukesha Umuyobozi w’Umudugudu wa Mwendo batuyemo avuga ko n’abo babuhanganiyeho na bo babubaruje bakaba babufitiye ibyangombwa.

Ku ruhande rwa Niyigira Fred bavuga ko barengana kuko bashaka kubambura ubutaka bakabuha Kayitare kandi azi neza ko babuguze dore ko ngo mu gihe babuguraga ari we wari Umunyamabanga Nshingwabikorwa w’ako kagari kandi na we akaba yarashyize umukono ku masezerano y’ubugure.

Umuyobozi w’Umudugudu avuga ko ari we wahuruje inzego z’umutekano kugira ngo zikiranure aba bagabo amaze kubona hatangiye impaka za ngo turwane. Yagize ati “Naje mpuruye numva abantu batongana bashaka kurwana mpageze mbona hashobora kugwa umuntu mpita mpamagara ubuyobozi bwa Polisi ya Nyagatare.”

Kuri buri ruhande rw’abari bahanganye hari abashumba barenga bane batangiye guhana za renga nkumene. Cyakora ngo polisi ihageze yahise itwara Niyigira Fred ijya kumufunga; nk’uko Umuyobozi w’Umudugudu yakomeje abisobanura.

Uretse Niyigira Fred, ngo nyuma inzego z’umutekano zaje kugaruka zinatwara umwe mu bashumba be na we ubu akaba afunzwe. Umuyobozi w’umudugudu wa Mwendo avuga ko uwo mushumba yafunzwe azira kuba yaratutse abapolisi.

Abo mu muryango wa Niyigira Fred bavuga ko ikibazo cye atari icy’ubu kuko ngo cyageze no mu nkiko ndetse akaba yaranishinganishije kwa Minisitiri w’Intebe no kwa Perezida wa Repubulika.

Umwunganizi mu mategeko wa Niyigira Fred, Me Butare avuga ko inzego z’umutekano zamubwiye ko umukiliya we afungiwe kwigomeka ku buyobozi cyakora akaba avuga ko mu ntangiriro z’icyumweru gitaha ubushinjacyaha buzamugezaho ku buryo butomoye icyo uwo yunganira azira.

Niyonzima Oswald