Kuri uyu wa gatanu tariki 15/5/2015, ihuriro ry’amakoperative y’abahinzi b’umuceri mu kibaya cy’umugezi w’Umuvumba (UCORIVAM) bashyikirije ubuyobozi bwabo amabaruwa asaba ko ingingo ya 101 y’itegeko nshinga yahindurwa kugira ngo bayigeze ku nteko ishinga amategeko.

Kantengwa Vestine umwe muri aba baturage avuga ko iterambere babona rigera ku Banyarwanda ari byo byatuma ingingo igize itegeko nshinga yahindurwa. Batanga ingero z’uko uretse kuba ibigo by’imari byaregerejwe abaturage n’umwana w’umukene yiga nta nkomyi.

Ikindi ngo nk’abahinzi b’umuceri bamenye guhinga ku buryo ifaranga ribageraho neza. By’umwihariko nk’umugore ngo yifuza ko umugore yakomeza guhabwa uburenganzira, nk’uko bimeze ubu hagenderwa ku bushobozi afite.

Nkurunziza Jean Damascene umuyobozi w’iri huriro, avuga ko kuba aribo bagize uruhare mu kwitorera itegeko nshinga banafite uruhare rukomeye mu kurihindura. Kuba abagize inteko ishingamategeko basubiza inyuma ikifuzo cyabo ngo baba birengagije ko nabo aribo babatoye kubahagararira bityo ngo bahita babeguza bagatora abashobora kumva ibyifuzo byabo.

Agira ati “Abagize inteko nitwe twabatoye, nibatagarura itegeko nshinga ngo turisubiremo ni uburenganzira bwacu kubakuraho tugashyiraho abatwumvira.”

Mu bindi aba bahinzi b’umuceri bashimira umukuru w’igihugu bityo bakifuza ko itegeko bitoreye ritamuzitira kongera kwiyamamaza, ni ibikorwa remezo harimo umuriro w’amashanyarazi, imihanda, ubuzima bwiza nko kwivuriza ku bwisungane mu kwivuza kuburyo ntawukirembera mu rugo, guhabwa ijambo ku bagore n’uburezi bw’umwana w’umukobwa n’ibindi. Inzandiko ihuriro ry’amakoperative zimaze kwakira ni 2226 zihanywe n’abanyamuryango bose bibumbiye mu makoperative ane y’abahinzi b’umuceri mu karere ka Nyagatare.

SEBASAZA Gasana Emmanuel