Inama y’Abaminisitiri yateranye ku wa Mbere tariki ya 15 Werurwe 2021 yemeje ko ingendo zihuza Intara n’Umujyi wa Kigali zisubukurwa ariko imodoka ntirenze 75% by’abagenzi igenewe gutwara.

Umushoferi witwa Ntambabazi Etienne, avuga ko bishimiye iki cyemezo kuko babonye uko bongera gutunga imiryango yabo.

Ati "Gufunga ingendo zihuza Intara n’Umujyi wa Kigali byatugizeho ingaruka kuko benshi ntitwakoraga, gutunga imiryango yacu byari ikibazo kuko aho dukura nta handi uretse ku modoka, ubu rero tugiye gufatanya n’abandi gushishikariza abantu kubahiriza amabwiriza yashyizweho yo kwirinda iki cyorezo".

Umuyobozi wa RFTC mu Karere ka Nyagatare, Céléstin Twahirwa, avuga ko kuba ingendo zasubukuwe nabo bagiye gukora ibishoboka bagafasha Leta mu kubahiriza amabwiriza ajyanye no kwirinda Covid-19.

Agira ati "Twishimye nibyo ariko na none tugomba kubahiriza ingamba zo kwirinda Covid-19 ndetse n’abashoferi bacu twabasabye kugenda babiganiriza abagenzi kugira ngo buri wese abigire ibye, ejo tutazasubira muri Guma mu karere cyangwa Guma mu Rugo".

Avuga ko ubu abagenzi binjira mu modoka babanje gukaraba no kuba bambaye neza agapfukamunwa, kandi mbere y’uko imodoka ihaguruka, uyitwaye abanza kureba ko abagenzi bicaye mu buryo bwagenwe.