Nkurunziza Jean Damascène, umuyobozi w’ihuriro ry’amakoperative y’abahinzi b’umuceri mu kibaya cy’umugezi w’umuvumba, yavuze ko uru rugendo rwo kwamagana icuruzwa ry’abana n’imirimo ivunanye ibakoreshwa baruteguye bagamije gushishikariza abaturage cyane abahinzi b’umuceri kubirwanya.

By’umwihariko muri aka gace ngo n’ubwo ari mu cyaro ntibibujije ko hari abana b’abakobwa baba bacuruzwa. Ikindi ngo mu mirima y’umuceri hari abana bagikoreshwamo bamurura (birukana) inyoni.

Yemeza ko uretse gukora uru rugendo rwo kubyamagana ngo bagiye no kuzamanuka mu gishanga kureba ko koko abana batacyamurura inyoni.

Gakuru James, umunyamabanga nshingwabikorwa w’Umurenge wa Mukama, umwe mu mirenge 7 ikora kuri iki gishanga gihingwamo umuceri ari naho hakunze kugaragara abana bamurura inyoni, avuga ko mu kurwanya iki gikorwa bazakomeza kwifashisha abahinzi b’umuceri kuko aribo bazanamo abana.

Kurwanya icuruzwa ry’abana n’imirimo mibi ibakoreshwa ngo si igikorwa kireba ubuyobozi cyangwa inzego zishinzwe umutekano gusa, ahubwo ngo kireba buri munyarwanda.

Abagikoresha abana mu kwamurura inyoni bo ngo bazabihanirwa bikomeye kuko bagirira nabi igihugu.

Abahinzi b’umuceri basabwa kutongera guhirahira gukoresha abana kwamurura inyoni kuko uzabifatirwamo azabihanirwa bikomeye. Mu karere ka Nyagatare imirimo mibi ikunze gukoreshwa abana ni ukwamurura inyoni mu mirima y’umuceri, kuragira inka, gukoreshwa mu ngo n’ubucuruzi cyane ibw’ibisheke.

SEBASAZA Gasana Emmanuel