Meteo-Rwanda ivuga ko imvura iteganyijwe gukomeza kugabanuka mu Gihugu hose, ikazaba iri munsi gato y’ikigero cy’impuzandengo y’imvura isanzwe igwa mu Rwanda muri iki gihe.

Iminsi iteganyijwemo imvura izaba iri hagati ya zeru (0) n’ibiri (2) henshi mu Gihugu. Iyo minsi ni tariki ya 1 na 7 cyane cyane mu bice byinshi by’Intara y’Iburengerazuba n’iy’Amajyaruguru, mu gihe ahandi izaboneka hake.

Imvura iteganyijwe izaturuka ku miterere ya buri hantu nk’imisozi miremire, amashyamba n’ibiyaga.

Imvura iri hagati ya milimetero 15 na 20 ni yo nyinshi iteganyijwe mu bice by’u burengerazuba bw’Akarere ka Rubavu, mu majyaruguru y’Akarere ka Nyabihu no muri Pariki y’Igihugu y’Ibirunga.

Imvura iri hagati ya milimetero 10 na 15 iteganyijwe henshi mu turere twa Musanze na Rutsiro, mu bice by’amajyaruguru y’Uturere twa Karongi, Nyabihu na Burera, ndetse no mu bice bisigaye by’Akarere ka Rubavu.

Imvura iri hagati ya milimetero 5 na 10 iteganyijwe mu bice bisigaye by’Intara y’Iburengerazuba n’iy’Amajyaruguru uretse mu turere twa Rulindo na Gicumbi, mu bice by’amajyepfo ya Gakenke no mu burengerazuba bw’Akarere ka Rusizi, ho hateganyijwe imvura iri hasi ya milimetero 5.

Ahandi hose mu Gihugu hateganyijwe imvura iri munsi ya milimetero 5 nk’uko bigaragazwa n’ikarita y’imvura iteganyijwe muri iki gihe cy’iminsi 10, guhera ku wa Gatandatu tariki ya mbere Nyakanga 2023.