Mu kiganiro yagiranye n’abanyamakuru kuri wa 24/12/2014, umuvugizi wa Leta y’u Rwanda yasobanuye ko u Rwanda rwiteguye neza itari ya kabiri Mutarama 2015 yahawe umutwe wa FDLR, ko ugomba kuba warangije kurambika intwaro hasi, ugataha mu Rwanda mu mahoro.

“FDLR ntabwo ari umutwe wa gisirikare ushobora gutera u Rwanda ngo urwane narwo, ntabwo bishoboka, kubera ko tuzi uko ingabo zacu ziteguye; igisigaye ni ubushake bwa politiki z’ibihugu byiyemeza guhashya imitwe iri muri Kongo ariko hakaboneka impamvu zidafatika, ibyo ntabwo byagombye kumara imyaka,…naho ubundi FDLR turayiteguye yaza irwana cyangwa itarwana, nayo kandi irabizi”, Ministiri Mushikiwabo.

Umubano w’igihugu mu muryango wa EAC no hanze yawo

Mme Louise Mushikiwabo akomeza asobanura ko nta mpungenge ziri mu kuba ibihugu bitatu byo mu muryango w’Afurika y’uburasirazuba (EAC) ari byo Kenya, Uganda, u Rwanda (ndetse na Sudani y’epfo); byariyemeje guteza imbere umuhora wa ruguru uva ku cyambu cya Mombasa, hanyuma ibindi bibiri (u Burundi, Tanzania) bikifatanya na Kongo (Kinshasa) nabyo bikaba bishaka gukora undi muhora w’ibicuruzwa byabyo.

Ministiri w’ububanyi n’amahanga akaba n’umuvugizi wa Leta, Louise Mushikiwabo, mu kiganiro n’abanyamakuru.

Yavuze ko buri gihugu gifata ibyemezo bikibereye cyifuza; kuba ibihugu bimwe byumvikana ku bikorwa runaka ngo ni byiza kandi ntaho byica amasezerano agenga umuryango wa EAC, aho asobanura kandi ko ayo masezerano akirimo gukurikizwa kuko ngo mu nama zirebana n’Umuhora wa ruguru (Nothern Corridor), u Burundi na Tanzania bihora bihagararariwe.

Ministiri Mushikiwabo yashimye uburyo abaturage b’u Rwanda bamaze kungukira cyane ku ishyirwaho ry’akarere kamwe ka gasutamo ku cyambu cya Mombasa, ndetse n’ikurwaho ry’imbogamizi nyinshi zidashingiye ku mahoro mu nzira izana ibicuruzwa mu Rwanda.

“Ibicuruzwa bisigaye bimara iminsi mike cyane mu nzira, kandi nta cyiza nko kumva ko Umunyarwanda nagera muri Uganda, Kenya, yakwiyumva nk’iwabo”, nk’uko yabaye abyishimiye mu gihe hagitegerejwe gari ya moshi, imiyoboro ya peterori n’amashanyarazi bizagezwa mu Rwanda.

Ibibazo u Rwanda rwagiranye n’igihugu cya Afurika y’epfo ngo bifite aho bizakomeza kuganirirwa, kuko Ministiri Mushikiwabo ngo afite icyizere gishingiye kukuba “abantu babiri cyangwa batatu [bo muri RNC] bashatse guhungabanya umutekano w’u Rwanda”, ngo badashobora gutuma ibibazo by’ibihugu byombi biba akarande.

U Burundi nabwo (ku kibazo cy’imirambo yagaragaye mu kiyaga cya Rweru) ngo ni igihugu kivandimwe ntacyo bwapfa n’u Rwanda, bukaba bwarasabwe kwemera iperereza rikorewe hamwe; naho u Bufaransa bwo ngo nta kibazo gihari gishyashya kuko za ambasade z’ibihugu byombi zifunguye, kandi ko zizakomeza gushyiraho uburyo bwo kunoza umubano.

Abanyamakuru n’abandi bakozi ba Leta bitabiriye ikiganiro cyatanzwe na Ministiri Mushikiwabo.

Ministiri Mushikiwabo wabajijwe uburyo bwakoreshejwe kugirango Leta y’u Rwanda ice intege imitwe ya politiki idashyigikiye u Rwanda, yagize ati: “Opozisiyo cyangwa amatsinda aba mu mahanga, kuba twarayiciye intege ntabwo ari byo, kuko n’ubundi nta ntege yagiraga; hari imitwe ya politiki iba kuri internet gusa”.

Inkunga y’u Bubiligi yahagaze ngo ntikwiye guca igikuba

nk’uko Ministiri w’ububanyi n’amahanga akaba n’Umuvugizi wa Leta,
Avuga ku kibazo cy’u Bubiligi bwahagaritse inkunga ya miliyoni 40 z’amayero bwari guha u Rwanda, Minisitiri w’ububanyi n’amahanga akaba n’Umuvugizi wa Leta yavuze ko “ibibazo bimwe na bimwe ngo bikomezwa n’abantu nta mpamvu”.

Yasobanuye ko “ari uburengenzira bw’icyo gihugu, ariko nta n’ikibazo gikomeye gihari”, kandi u Rwanda rukaba ngo rwiteguye kwakira ba Ministiri babiri b’u Bubiligi mu kwezi gutaha.

Ibindi byaganiriweho

Ministiri Mushikiwabo wanabajijwe ikibazo cy’ibyo u Rwanda rukora kugira ngo rwohereze abari abarwanyi ba M23 iwabo, yasubije ko rwakomeje kwibutsa ko byaganirwaho, ngo rukaba rugitegereje intumwa z’igihugu cya Kongo n’iz’umuryango w’Abibumbye (UN).

Muri rusange ngo umwaka wa 2014 wagenze neza ugereranyijwe n’indi myaka ya 2012 na 2013, ahavugwaga intambara ku mipaka y’u Rwanda na Kongo; ariko “uyu wabaye uw’amahoro” nk’uko Ministiri w’ububanyi n’amahanga yabyishimiye.

Yamenyesheje kandi ko u Rwanda ngo rushoje neza inshingano y’imyaka ibiri rumaze mu kanama k’umutekano ka UN, aho ngo rwamenyanye n’inshuti nyinshi, ndetse no kuba rwarakomeje kugira uruhare mu guharanira amahoro hirya no hino ku isi.

Hari ingabo z’u Rwanda zirenga 5,000 mu butumwa bw’amahoro bwa UN, mu bihugu bya Centrafrique, Sudani y’epfo na Sudani.

Simon Kamuzinzi