Gahunda ya NIDA yo kwegereza abaturage serivisi z’indangamuntu izamara ukwezi, guhera tariki 14 Gashyantare kugera tariki 11 Werurwe 2022, ikaba ibera mu turere twose mu mirenge imwe n’imwe.

NIDA isaba abantu kugenda bitwaje ibyangombwa shingiro birimo ifishi y’ubuzima bwabo mu gihe bari bakiri abana cyangwa icyemezo cy’amavuko, kuko abatabifite batarimo kwandikwa kugira ngo bazahabwe indangamuntu nshya.

Umuturage wo mu Murenge wa Gasaka mu Karere ka Nyamagabe, yabwiye RBA ko yifuje gukosoza indangamuntu ayijyana ku murenge ku itariki 15 Mata 2020, ariko kugeza ku itariki ya 14 y’uku kwezi kwa Gashyantare 2022, indangamuntu nshya ngo yari itaraboneka.

Umusore w’imyaka 27 uba i Kigali mu Karere ka Kicukiro, iwabo akaba ari i Nyamagabe, avuga ko indangamuntu asanganywe yanditsweho ko afite imyaka 40 y’ubukure, akaba amaze igihe asiragira ashaka ibisabwa birimo icyemezo cy’amavuko n’ifishi ye, kugira ngo bamuhindurire ayo makuru, ariko ifishi ngo yarayibuze.

Agira ati "Bantumye ibyangombwa by’amavuko n’ifishi nje ndayibura, none bari baje gukorera hano i Gasaka (Nyamagabe), nari ngarutse none barabyanze (kumpindurira imyaka iri ku ndangamuntu), ni ikibazo gikomeye".

Umukozi wa NIDA ushinzwe gutangaza amakuru, Annet Umugwaneza, avuga ko impamvu gutanga indangamuntu bitajya bipfa gukorwa, ari uko hari ibyangombwa abazifuza baba bagomba kugaragaza, bihamya ko amakuru batanze ari ukuri.

Umugwaneza agira ati "Ntabwo dupfa gukosora kuko dushingiye ku byo umuntu avuga n’amagambo gusa, ejo cyangwa ejo bundi yaza akavuga ngo ’navutse igihe iki n’iki’, tumaze kubona imiterere y’icyo kibazo hari ibyangombwa byagiye bishyirwaho, abantu bavuga ko bigorana ariko biraboneka, kandi si n’ukosoza gusa ubikenera".

Avuga ko hamaze kuba abantu benshi barengeje imyaka 16 y’ubukure ariko batarafata indangamuntu, kubera gutinda kujya kwifotoza ku murenge igihe bari bageze kuzifata, ubu na bo bakeneye kubanza kubiganiraho n’abayobozi b’inzego z’ibanze aho bavuka cyangwa aho ababyeyi batuye.

Umugwaneza avuga ko abana batazi aho bakomoka, bitewe n’uko ababyeyi babo baba barabataye ku mihanda bakiri impinja, NIDA ngo ifatanya n’ubuyobozi bw’ibanze bw’aho uwo mwana atuye, kugira ngo begeranye amakuru yatuma abasha kubona indangamuntu.

Imboganizi NIDA ivuga ko zikomeje kugaragara ngo zijyanye n’uko abashinzwe Irangamimerere mu mirenge, batagira umwanya uhagije wo kwakira abantu bafite ibibazo by’indangamuntu, bigatuma hari n’abarambirwa bakava mu ntara baza i Kigali kuri NIDA kuzishakira.

Umukozi w’Umurenge wa Tumba mu Karere ka Huye ushinzwe Irangamimerere, Nshimyimana Mico Aimable, yakomeje asobanura izindi mpamvu zituma umuntu atinda kubona indangamuntu, harimo kuba yarabaruwe kera (2007) ariko agatinda kujya kwifotoza ubwo yari agejeje imyaka 16.

Iyo NIDA ibonye umuntu wari kuba yarifotoje muri 2010 (ni urugero), akaba arimo kwifotoza muri uyu mwaka, ibanza kumwigwaho mbere yo kumukorera indangamuntu.

Undi muntu utinda kubona indangamuntu ni uba ataribaruje muri 2007 ubwo abakozi ba NIDA bajyaga muri buri rugo bakandika abo babwiwe gusa, nyamara hari abandi bo muri urwo rugo batavuzwe.

Mico avuga ko bene uwo muntu abanza gutera impungenge NIDA ko ashobora kuba ari umunyamahanga urimo kwibaruza kugira ngo ahabwe indangamuntu y’Ubunyarwanda.

Mico yakomeje asobanura ko abashinzwe irangamimerere mu mirenge ngo bafite inshingano nyinshi zishobora gutuma abashaka indangamuntu batabona serivsi buri munsi.

Ubuyobozi bw’Ikigo NIDA buvuga ko umuntu usabye Indangamuntu ku murenge afite ibyangombwa byuzuye atari akwiriye kurenza ukwezi kose atarayibona.