Mu mwaka w’1998, niho Nsanzamahoro Jean yatangije iyo koperative ihuje abarokotse Jenoside yakorewe Abatutsi, abireze bakemera icyaha, ingabo zavuye ku rugerero hamwe n’abandi baturage babishaka aho ubu ishimirwa kuba yarateje imbere ubumwe n’ubwiyunge mu karere ndetse ikanatwara ibihembo ku rwego rw’igihugu harimo n’icyo iherutse guhabwa na Unity Club muri Nzeri uyu mwaka.

Nsanzamahoro warokotse Jenoside ndetse akaba n’ingabo yavuye ku rugerero ntiyahwemye gushishikariza bagenzi be kubana mu mahoro, no gukora ibikorwa bigaragarira amaso bigamije ubumwe n’ubwiyunge nko kubakira abatishoboye kumpande zose, guhurira ku bikorwa by’iterambere birimo ubuhinzi, ubworozi n’ibindi.

Uyu mugabo wari unakuriye koperative y’Inkeragutabara mu karere yafatwaga nk’umuntu ukunda amahoro kandi uhora ushishikariza abantu kubana neza, n’abakene gukunda umurimo cyane cyane afasha abavuye ku rugerero kwihangira imirimo no kwikura mu bukene.

Kuwa 21 Ukuboza, Nsanzamahoro yishwe n’impanuka ya moto ubwo yavaga mu mujyi wa Ngororero aho afite ibikorwa by’ubucuruzi atashye iwe ahitwa i Gatumba. Atabarutse afite imyaka 42, akaba asize umugore umwe n’abana 7. Tumwifurije iruhuko rudashira.

Ernest Kalinganire