Munyankunzi Marc, umunyamabanga nshingwabikorwa w’akagari ka Tetero yiyemerera ko bafataga abaturage bagombaga kwishyura amafaranga yinjira mu mari y’akarere maze bakabaha gitansi y’ayo bakiriye ariko kuri sushe (souche) isigara ari nayo ababara amafaranga yinjiye babariraho bakandikaho amafaranga makeya andi bakayagabana.

Gusa, uwo bakurikiranwe hamwe ariwe Simukeka Jean d’Amour, ahakana ko ayo mafaranga bayagabanaga ahubwo ngo umunyamabanga nshingwabikorwa yayakoreshaga uko ashaka, ndetse we akaba yaranagize uruhare mu kubimenyesha ubuyobozi bw’umurenge ngo bukurikirane Munyankunzi.

Munyankunzi we avuga ko uyu yatanze amakuru nyuma yo guhomba amafaranga y’imisanzu y’abaturage mu bwisungane mu kwivuza maze nayo akayegeka ku muyobozi w’akagari avuga ko yayamuhaye, aho bahombye arenga ibihumbi 200 muri ako kagari.

Aba bayobozi kandi banakurikiranyweho amafaranga agaragara mu magitansi bakiriye ariko bakaba batayagaragaza.

Iyi gitansi y’umwimerere ntabwo ihuje umubare w’amafaranga na souche yayo (munsi).

Mu guhimba amagitansi basigarana mu dutabo ari nayo abashinzwe kwakira amafaranga y’akarere bakoresha babara ayinjiye, aba bagabo bahindura impamvu uwishyuye yishyuriye, maze bakandikaho impamvu yishyurirwa amafaranga make nko kugira umwanda, kutagira ubwiherero, kutitabira umuganda n’inama n’ibindi.

Aba bayobozi bakurikiranyweho konona, kunyereza umutungo wa Leta no gukoresha inyandiko mpimbano, aho bazashyikirizwa inkiko.
Umuvugizi wa Polisi mu ntara y’Iburengerazuba C/SP Francis Gahima arahamagarira abayobozi kuba inyangamugayo bagakora ibyo bashinzwe neza batikururira ibihano.

Igihe iki cyaha cyabahama, bahanwa n’ingingo ya 325 yo mu rwunge rw’amategeko ahana y’u rwanda, aho bahanishwa igifungo kiri hagati y’imyaka 5 na 7, n’amande akubye inshuro kuva kuri 5 kuzamura, by’agaciro k’ibyo bakurikiranyweho.

Ernest Kalinganire