Honorable Kayiranga yasobanuye imikorere y’Inteko Ishinga Amategeko n’uburyo inshingano za komisiyo 9 ziyigize ziteye kandi zuzuzanya, nyuma yibanda ku nshingano za komisiyo ya politiki ayoboye.

Ku bijyanye n’umushinga w’itegeko rireba Imicungire y’umutungo w’abashakanye, umunani, izungura, irage n’impano; byagaragaye ko abitabiriye bari bakeneye kurisobanukirwa ukurikije ibibazo n’ibitekerezo byatanzwe.

Nzapfakumunsi Onesphore, Umuyobozi w’ikigo cy’amashuri abanza cya Ndaro mu murenge wa Ndaro, yatangaje ko yasobanukiwe kurushaho n’icungamutungo ku bashyingiranywe riri ugutatu: ivangamutungo rusange, ivangamutungo muhahano n’ivanguramutungo risesuye.

Uyu mugabo na bagenzi be batari bake ntibumvaga uburyo mu ishyingirwa umukobwa azana ibishyingiranwa agasanga umugabo we yarubatse inzu, yaraguze amasambu, yaroroye amatungo, afite amangazini… nyuma byaba ngombwa ko batandukana bakagabana kandi umugore yarazanye bike avanye iwabo asanga byinshi by’umugabo.

Aha basobanuriwe kujya bashishoza igihe cyo gusezerana bagahitamo ubwoko bubanogeye ku icungamutungo ku bashyingiranwe nta gahato bityo ntibazatungurwe n’amategeko agenga imiterere y’icungamutungo bazaba bihitiyemo.

Abitabiriye ikiganiro hugurwa batashye banyuzwe barimo abanyamabanga nshingwabikorwa b’imirenge, abaybozi b’ibigo by’amashuri 117 byo muri aka karere, abunzi n’abanyamategeko. Aba biyemeje kuzasobanura umushinga w’iri tegeko inzego zose bari bahagarariye kugirango amakimbirane akomoka ku mutungo w’abashakanye agabanuke.

Mu bibazo bikunze kubazwa n’abaturage bijyanye n’ihohoterwa mu ngo n’amakimibirane usanga ibyinshi bishingiye ku micungire mibi y’imitungo y’abashakanye iterwa no kudasobanukirwa n’amategeko ayigenga.

Uretse ibiganiro ku mushinga w’itegeko rigenga imicungire y’umutungo w’abashakanye, aba badepite bari bayobowe na Kayiranga Alfred Rwasa perezida wa komisiyo ya politiki, uburinganire bw’abagabo n’abagore mu iterambere ry’igihugu bashimiye ibyo akarere kamaze kugeraho birimo ibikorwa remezo nk’imihanda, amazi n’amashanyarazi, ubusitani bunogeye ijisho bukikije inyubako z’Akarere ka Ngororero.

Ernest Kalinganire