Iki gikorwa kirimo kubera mu cyitwa inteko y’akarere yateraniye ku biro by’akarere ka Ngoma.

Nubwo imvura yari nyinshi, saa 10h00 abantu batari bake bari bamaze kuhagera ndetse bashyizeho morale ari yose bishimira ko bagiye gushyigikira ikigega gituma bagira agaciro nk’uko babivugaga.

Uwitwa Ndaruhutse witabiriye iki gikorwa yagize ati “Imvura ntawe yabuza kwihesha agaciro. Kuba umuntu yemera akanyagirwa bigaragaza ko agaciro gaharanirwa. Twiteguye gushyigikira ikigega cyacu.”

Uretse ndaruhutse n’abandi bateraniye muri iki gikorwa wabonaga ko bishimye ku maso yabo kandi n’akadiho bagacinyaga barwanya ubukonje.

Ubuyobozi bw’akarere ka Ngoma bwari bumaze iminsi bucisha amatangazo ku maradiyo ndetse bunatanga ubutumire mu gikorwa cyo kumurika imihigo yako ndetse no gutangiza ikigega “Agaciro Development Fund”.

Ikigega agaciro development fund giherutse gutangizwa ku rwego rw’igihugu na Nyakubahwa Perezida wa Republika y’u Rwanda, Paul Kagame. Iki kigega kije kwihutisha iterambere abaturage babigizemo uruhare badategereje inkunga z’amahanga.

Jean Claude Gakwaya